Районти тĕп библиотекăра ача-пăча кĕнекисен эрнелĕхĕ пырать. Çавна май çак эрнере шкулсенче, библиотекăра тĕрлĕ мероприятисем иртеççĕ. Акă, çак кунсенче ача-пăча библиотекинче П.П.Таллеровăн "Православные храмы Комсомольского района" кĕнекин презентацийĕ пулчĕ. Сăмах май, П.П.Таллеров- пирĕн ентеш. Вăл Нĕркеç ялĕнче çуралса ỹснĕ. Район çинчен тĕрлĕ кĕнеке кăларнă. Вăл- ЧР культура тава тивĕçлĕ ĕçченĕ. Петр Пантелеймонович уява хăй те килсе çитнĕ. Комсомольски пĕрремĕш вăтам шкулĕнчи Л.П.Яковлева, Л.И.Ефремова учительницăсем, Р.Н.Свистунова библиоткарь ертсе пынипе 8 класс ачисем библиотекăра тĕл пулăва хутшăнчĕç. Тĕл пулăва чи малтанах Л.Н.Морозова библиотекарь уçрĕ. Ачасене 2006 çул Ăс-хакăл çутлăхĕн çулталăкĕ пулнине каларĕ, çавна май тĕн культури çинче чарăнса тăчĕ. Кунта тĕн кĕнекисен выставкине те йĕркеленĕ. П.П.Таллеров ачасене хăй çырнă "Храм Рождества Христова", "Возжена свеча неусыпной", "Савнă ялăм", "Легла на плечи", "Чувашские народные академики" кĕнекисемпе паллаштарчĕ. Вĕсен кĕске историне каласа пачĕ. "Православные храмы Комсомольского района" кĕнеки пирки тĕплĕнрех чарăнса тăчĕ. Кĕнеке кăларма документсене пуçтарма пулăшнă çынсене, уйрăмах Вознесения Господне чиркỹ настоятельне Алексий аттене, тав сăмахĕ каларĕ. Кĕнекери историпе паллаштарнă май, паянхи кун районта 5 чиркỹ ĕçленине асăнчĕ. Комсомольски районĕнчи паллă академиксене П.П.Таллерова, И.П.Кокшина, В.Я.Григорьева, Г.Н.Ксенофонтова, А.К.Краснова асăнса хăварчĕ. "Вĕсемпе район чăннипех мухтанма пултарать",- терĕ академик. Петр Пантелеймонович "Надежда" хĕрарăмсен клубĕн членĕсемпе те тĕл пулса калаçрĕ. Вĕсен ыйтăвĕсем çине туллин хуравларĕ. Хăй ятĕнчен автор ача-пăча библиотекипе шкул библиотекисене кĕнекесем парнелерĕ.