-теççĕ. Чăннипех çапла ĕнтĕ, çумра юратнă, шанчăклă мăшăр тĕрев парса пырсан, пĕр-пĕрне çур сăмахран ăнланса пурăнсан, нимĕнле йывăрлăх та хăрушă пек туйăнмасть. Акă, Комсомольски ялĕнчи Зубаревсен çемйи тĕл пулакан пур чăрмава та çĕнтерсе пĕрле çур ĕмĕр пурăннă. Апрелĕн 25-мĕшĕнче Сергей Ивановичпа Ольга Ивановна ылтăн туйне паллă турĕç. Çак юбилее ЗАГС уйрăмĕнче савăнăçлă лару-тăрура ирттерчĕç. Юбилярсене район пуçлăхĕн çумĕ Георгий Киргизов, РФ Пенси фончĕн районти управленийĕн начальникĕ Зоя Каринкина, социаллă хỹтлĕх пайĕн заведующийĕ Ираида Никитина, çывăх çыннисем саламларĕç. Утса тухнă çулсем вăрăм пулин те, тăххăрмĕш теçеткене шутлама пуçланă ватăсем пурнăç интересне çухатман-ха. Сергей Иванович _ Аслă Отечественнăй вăрçă участникĕ. Вăрçă çулĕсем унăн Берлин çывăхĕнчи Меркини- Фриланд аэродромĕнче вĕçленнĕ. Тăван çĕршыва çаврăнса çитсен ĕнерхи салтак тỹрех мирлĕ ĕçе пикеннĕ. Аш-какай комбиначĕн директорĕнче, кăнтăр электричество сечĕсен начальникĕн-че ĕçленĕ, унтанах тивĕçлĕ канăва кайнă. Ольга Ивановна вара хăйĕн пурнăçне шут ĕçĕпе çыхăнтарнă, районти çутĕç пайĕн бухгалтерĕнче вăй хунă. Тивĕçлĕ канăва кайсан хĕрарăм куç курманнисен районти обществине ертсе пынă. Мăшăр икĕ ывăлпа пĕр хĕр çуратса ỹстернĕ. Шел пулин те, ывăлĕ Николай çичĕ çул каялла пурнăçран сарăмсăр уйрăлнă. Светлана хĕрĕпе вара чăннипех мăнаçланма пулать. Вăл Мускавра ĕçлет, таможня службин полковникĕ. Сергей Иванович çулсен юхăмне парăнма шутламасть те. 83 çула çитсе пырать пулин те, вăл спорт ветеранĕсен Пĕтĕм Раççейри триатлон ăмăртăвĕсене хутшăнать, лайăх кăтартусем туса кашнинчех медальсемпе, грамотăсемпе таврăнать. Халĕ Зубаревсем Мускав облаçĕнче пурăнаççĕ пулин те, Сергей Иванович тăван района час-часах килсе çỹрет. Ылтăн туйне те тăван ялтах ирттерме кăмăл тунă пысăк стажлă мăшăр.