Çурхи ака-суха ĕçĕсене пĕтерсен асатте-асаннесен мĕн авалтанах ака пăтти тăвас йăла пулнă. Акнă тырă-пулă, лартнă çимĕç ăнса пултăр, кĕркунне пысăк тухăç илес тесе тунă çакна. Ваттисен йăлине асран кăлармасть район халăхĕ, ака паттăрĕсене чысласа Акатуй ирттерет. "Дружба" ял хуçалăх кооперативĕнче çакăн пек уяв майăн 27-мĕшĕнче пулчĕ. Уява хуçалăхăн профком председателĕ Е.Иванов уçрĕ. Чи малтанах кооператив председателĕ Р.М.Мансуров уй-хирте, выльăх-чĕрлĕх патĕнче ĕçлекенсене çураки вĕçленнĕ ятпа саламласа хастар ĕçшĕн мухтарĕ, тав турĕ. Ĕçченсем преми илме тивĕç пулчĕç. Водительсене те, выльăх-чĕрлĕх пăхакансене те манса хăвармарĕ кооператив правленийĕ. Район администрацийĕн ĕçĕсене туса пыракан Ю.В.Скворцов, районти почтамт начальникĕ В.Н.Гордеев та салам сăмахĕсем тухса каларĕç. Çавăн пекех Эльпуç ял поселенийĕн пуçлăхĕ Н.П.Носов, Хирти Явăш вăтам шкулĕн директорĕ Н.Г.Ильин, Аслă Çĕрпỹел ял поселенийĕн пуçлăхĕ Г.Г.Ракчеев тата ыттисем те сăмах илчĕç. Юрă-ташăсăр уяв та уяв пек мар. Вырăнти художество пултарулăх коллективĕсем, Хирти Явăш вăтам шкулĕн вĕренекенĕсем, уйрăм солистсем сцена çине пĕрин хыççăн тепри тухрĕç. Хирти Выçлири сысна ферминче ытларах арçынсем вăй хураççĕ. Вĕсем вара ĕçре кăна мар, юрă-ташăра та маттур пулни курăнчĕ. Хăйсен илемлĕ юрри-ташшипе пурне те тĕлĕнтерчĕç. Чăваш эстрада юрăçисем те - Л.Семенова, В.Семенов, Г.Смирнова тата "Хавас" ушкăн хăйсен юррисемпе савăнтарчĕç. Ĕçре çеç мар, спортра та пултаруллă кунти ывăл-хĕр. Çумăр çăва пуçларĕ пулин те спортсменсене хăратмарĕ. Михĕпе çапăçас тупăшура, кире пуканĕ йăтассипе, алă вăйне виçессипе, вĕрен туртассипе, лашапа чупса ăмăртассипе тата ытти енĕпе те пултаруллисене палăртрĕç. Акă, кире пуканĕ йăтассипе И.Хайруллина çитекенни пулмарĕ. Лашапа чупса Р.Хамидуллин мала тухрĕ. Михĕпе çапăçас енĕпе 1-мĕш вырăна М.Халитов (Тутар Эльпуç), 2-мĕш вырăна А.Сергеев (Хирти Явăш), 3-мĕш вырăна В.Розов (Хирти Выçли) тивĕçрĕç. Волейбол турнирĕ уява вĕçлерĕ.