"2002-2010 çулччен ялсене социаллă аталантарасси çинчен" программăна пурнăçа кĕртес тĕлĕшпе ЧР "Волгателеком" ОООн Патăрьелĕнчи районсем хушшинчи электроçыхăну узелĕн Комсомольскинчи филиалĕ линипе çителĕклĕн тивĕçтерес ĕçе пуçăннă. Программăпа килĕшỹллĕн, районти 14 ялти телефон станци-йĕсене тĕпрен улăштараççĕ, АТСК-50 / 200 станци вырăнне АТСЭ-"Элкан" çĕнĕ йышши аппаратсем лартаççĕ. Çавна май ялсене цифрăллă номерсемпе тивĕçтереççĕ, линисене çĕнетеççĕ. Асанкасси, Хирти Сĕнтĕр, Хырай Ĕнел, Дубовка пуçламăш станцисенче хĕрỹ ĕç пырать. Ялсенчи урамсенче ятарлă тракторсем кабель хураççĕ. Телефон çĕнĕрен кĕртес текенсене связистсем номерсемпе тивĕçтереççĕ. Пỹрте кĕрекен кабель валли хуçан хăйĕн чавмалла. Телефонлă пулас тесессĕн 3500 тенкĕ укçа тỹлемелле. Малтанлăха договор çырса хатĕрлеме 1000 тенкĕлĕх тăкаклани çителĕклĕ. Унсăр пуçне уйăхсерен телефонпа усă курнăшăн _ 180 тенкĕ. Çавăн пекех район çыннисен килте компьютер пулсассăн Интернетпа çыхăнма май пур. Районти электроузела заявка çырмалла. Кирлĕ вăхăтра телефон кĕпçи яланах ал айĕнче пултăр. Уйрăмах ял çыннисемшĕн вăл пысăк пулăшу. Ватăсемшĕн пушшех те. Тивĕçлĕ канăва тухнисен те телефон кĕртес укçана уйăхсерен тỹлеве 100 проценчĕпех тỹлеме тивет. "Ĕç ветеранĕ" категорири çынсене телефонпа усă курнăшăн уйăх-серен тỹлекен укçан 50 процентне районти социаллă хỹтлĕх пайĕ саплаштарать. Айăпсăр айăпласа шар курнă, каярахпа реабилитациленĕ çынсене çеç социаллă хỹтлĕх пайĕ пысăк çăмăллăхсем парать. Вĕсем телефона тỹлевсĕрех кĕртме пултараççĕ.