Чăваш Республикин Президенчĕ Н.Федоров "Чăваш Республикинче культурăна пулăшу парас енĕпе пурнăçламалли хушма мерăсем çинчен" Указ кăларнă. Унăн тĕллевĕ - общество аталанăвĕнче культура тата искусство питĕ пысăк пĕлтерĕшлĕ пулнине ăнланса, çавăн пекех культура тата искусство ĕçченĕсене патшалăх пулăшăвĕ парассине вăйлатас, вĕсен професси ăсталăхне ỹстерме тата пултарулăхĕпе паллаштарма условисем туса парасси. Указ культура учрежденийĕсенче ĕçлекенсен шалăвне самай ỹстерме май парать. Ведомствăн Хисеп паллисене тивĕçнĕ çынсене хушса тỹлĕç. Çав хушăрах отраслĕн хавхалантарма тỹлекен пĕтĕм хушма укçа сыхланса юлать. 2007 çултан пуçласа профессионал коллективсен пултарулăх проекчĕсене пулăшма ЧР Президенчĕн икĕ грантне туса хума палăртать. Вĕсен виçи - пĕрер миллион тенкĕ. Грант-сем культура та искусство ĕçченĕсен професси шайне ỹстерме пулăшĕç. Обществăри ăс-хакăлпа культурăна ỹстерессипе çыхăнă ĕç-хĕлĕн курăмлă пайĕ - библиотека отрасльне информацин çĕнĕ технологийĕсемпе пуянлатни. 2007 çулта, Республика кунĕ тĕлне, Чăваш Енри библиотекăсен тытăмне тĕпрен çĕнетес ĕçе вĕçлеме палăртнă. 500 тĕслĕх библиотекин сетьне йĕркелесе пĕтермелле. Федераци саккунĕнчи юлашки улшăнусемпе килĕшỹллĕн çынсен пушă вăхăтне усăллă йĕркелессипе, культура енĕпе пулăшу парассипе çыхăннă ĕçе туса пырассине районсене панă. Çавна май район, хула администрацийĕсен тытăмĕнче культура пайĕсем туса хурасси вырăнлине палăртнă. Асăннă Указ ялта тĕпрен çĕнетнĕ клуб учрежденийĕсем (нумай профиллĕ пĕрлештернĕ центрсем) туса хума çул уçать. Вĕсем ял çыннине культурăн тĕрлĕ енĕпе тивĕçтерессине анлăлатма, ачасемпе çамрăксене хăйсен талантне уçма пулăшĕç. Пĕтĕмĕшле илсен, асăннă Указа пурнăçа кĕртни Чăваш Республикин культура тата ăс-хакăлпа кăмăл-сипет хăватне пысăклатма, халăхăн пурнăç пахалăхне ỹстерме май парать.