Пушар мĕн тери хăрушă пулнине пиртен кашниех лайăх ăнланать. Вут-кăварпа кĕрешме вара чи малтан пушар хуралĕн ĕçченĕсем çитеççĕ. Вĕсен сывлăх енчен çирĕп, вăй-хал тĕлĕшĕнчен тĕреклĕ пулмалла, темĕнле кăткăс лару-тăруран та тухма пĕлмелле, пушар сỹнтермелли хатĕр-хĕтĕрпе тĕрĕс те ăнланса усă курмалла. Пушар ĕçченĕсенчен чи пултаруллисене тупса палăртас тĕлĕшпе район, Республика, Раççей шайĕнче çеç мар, Пĕтĕм тĕнчери ăмăртусем те йĕркелеççĕ. Иртнĕ эрнере вара пирĕн районти 31-мĕш пушар чаçĕн территорийĕнче пушар спорчĕ енĕпе республикăри кăнтăр районĕсенчи пушар хуралĕн ĕçченĕсем хушшинче ăмăрту пулса иртрĕ. Унта Комсомольски, Патăрьел, Елчĕк, Шăмăршă, Йĕпреç, Тăвай районĕсенчи пушар чаçĕнчи ĕçченсем хутшăнчĕç. Ăмăртăва РФ чрезвычайлă лару-тăру министерствин Чăваш Республикинчи управленийĕн представителĕ, тĕп судья А.М.Серебряков уçрĕ. Килнисене 31-мĕш пушар чаçĕн начальникĕ С.А.Алексеев саламларĕ, ăнăçу сунчĕ. Çак кун, ăмăртусем пуçланиччен, çумăр çуса кайни пушар хуралĕн ĕçченĕсене пăртак чăрмав та кỹчĕ. Анчах та темĕнле лару-тăрура та çухалса кайман ĕçченсене çакă хумхантармарĕ. Малтанах вĕсем штурмламалли чикмекпе çуртăн тăваттăмĕш хутне вăхăтра хăпарассипе тупăшрĕç. Пĕринчен тепри вăр-вартарах. Анчах та кунта пирĕн район командинчи Андрей Жукова çитекенни пулмарĕ. Вăл пуринчен те хăвăртрах чикмеке этаж хыççăн этаж çине çаклатса 4-мĕш хута çитрĕ. Тепĕр ен вăл - виçĕ сыпăклă чикмеке вырнаçтарса лартасси. Ун тăрăх хăпарас енĕпе те комсомольскисем палăрчĕç. Андрей Жуковпа Андрей Жирнов çакна пысăк ăсталăхпа пурнăçларĕç. Малалла вара пушар хуралĕнче ĕçлекенсен тĕрлĕ чăрмавсене çĕнтерсе 100 метра чупмалла пулчĕ. Кунта çирĕп вăй-хал, ăсталăх, ĕçсене тĕрĕс пурнăçлани кирлĕ пулчĕ. Ку енĕпе Андрей Жуков 2-мĕш вырăна тухрĕ. Пушар машинине шыв тултарса рукавсене тăсса шыв сирпĕтсе ятарлă мечĕксене сапса антармалла. Çак ĕçе пĕтĕм команда пурнăçлать. Пирĕн районти пушар хуралĕн ĕçченĕсем ку енĕпе виççĕмĕш пулчĕç. Ăмăрту пĕтĕмлетĕвĕ мĕнле-ха? Комсомольскисем чи лайăх кăтартупа палăрчĕç, 1-мĕш вырăна çĕнсе илчĕç. Шăмăршă пушар чаçĕн команди 2-мĕш пулчĕ, тăвайсем 3-мĕш вырăнта. Кунта, паллах, кашни ĕçченĕн, спортсменăн тỹпи пур. Команда чысне Андрей Жуков, Андрей Жирнов, Александр Прохоров, Герман Крылов, Алексей Петров, Михаил Дряблов хỹтĕлерĕç. Çĕнте-рỹçĕсене Хисеп грамотисемпе наградăланă. Вĕсен район чысне республикăри пушар спорчĕн ăмăртăвĕнче хỹтĕлемелле пулĕ. Ăнăçу сунар вĕсене. Çакăн пек ăмăртусем йĕркелени пушар хуралĕнче ĕçлекенсене яланах хатĕр пулма, хăйсен ăсталăхне ỹстерсе пыма пулăшмалла.