Чăваш Ен Вĕрентỹ министерствинче "Вĕрентỹ" наци проектне пурнăçа кĕртес тĕлĕшпе ĕçлĕ канашлу иртнĕ. Пухăннисем конкурс ĕçĕсемпе паллашнă, 100 пин тенкĕ грант илме тăратнă учительсен списокне пăхса тухнă. 112 вĕрентекене Раççей Президенчĕн премийĕпе наградăлаççĕ, тепĕр 30-шне Чăваш Ен Президенчĕ 10 пин парса чыслать. Пирĕн районти Комсомольски иккĕмĕш вăтам шкулĕнчи математикăпа информатика предметне вĕрентекен Лидия Глинкина 100 пин, 1-мĕш номерлĕ шкулти Т.П.Титовпа Г.Н.Петров учительсем 10-шар пин тенкĕлĕх премине тивĕçнĕ. Саламлатпăр. Малашне те ăнăçу сунатпăр.

"Моя страна - моя Россия" Раççейри çамрăксен автор проекчĕсен конкурсне пĕтĕмлетнĕ. "Решение проблем экологической безопасности" номинацире районти çамрăксен енĕпе ĕçлекен специалист Эльмира Зинатуллина "Новое дыхание" проекчĕпе çĕнтернĕ. Проектăн тĕп тĕллевĕ - районти пĕчĕк юханшывсене çỹп-çапран тасатасси. Çак ĕçе учетра тăракан çул çитмен ачасене ытларах явăçтармалла. Асăннă проектпа 3 ыйтăва татса пама пулать. Чи малтанах, экологи ыйтăвне лайăхлатма май пур. Йывăр ачасене те ĕçлеттерни паха. Çамрăксем çуллахи вăхăтра ĕçлеме пултараççĕ, конкурс çĕнтерỹçисене дипломсемпе чыслаççĕ. Эльмира Зинатуллинăн "Новое дыхание" ĕçне практикăра усă курма сĕннĕ.

Июнь-июль уйăхĕсенче районти ял поселенийĕсен сайчĕсенче 180 хыпар вырнаçтарнă. Вăл шутран 51 информацийĕ - администраци сайтĕнче. Икĕ уйăхра ял поселенийĕсен сайчĕсенче хыпарсене пĕр тикĕс вырнаçтарман. Тĕслĕхрен, Кайнлăк, Комсомольски ял поселенийĕсем пач хыпар паман. Юлашки вăхăтра ытларах информаци парас енĕпе Хирти Сĕнтĕр, Хырхĕрри ял поселенийĕсем аван ĕçлеççĕ. Информацисене тематика енчен тишкерес пулсассăн, обществăлла пурнăç, культура, выльăх апачĕ хатĕрлес ыйтусене çутатнă. Ял поселенийĕн пурнăçне тĕплĕн çутатма тăрăшнă. Иртнĕ икĕ уйăхра Эльпуç ял поселенийĕ сайтра чи нумай хыпар - 35 вырнаçтарнă. Вĕсен информацийĕ хăйне евĕрлĕ пуян.