Кăнтăр енчи районсенче вырнаçнă пушар чаçĕсен ăмăртăвĕ кăçал пирĕн районта пулни пирки пĕлтернĕччĕ ĕнтĕ. Унта чи нумай балл пуçтарса комсомольскисем пĕрремĕш вырăн йышăнчĕç. Куншăн тĕлĕнме кирлĕ мар. Унта хăйсен ĕçне пĕлекен, вăй-хал, ăсталăх енчен пултаруллисем вăй хураççĕ. Пушар спорчĕ енĕпе иртекен ăмăртусенче çулсеренех малти вырăн йышăнаççĕ. Кăçал пушар спорчĕн финалти ăмăртăвĕсем Сĕнтĕрвăрри хулинче иртнĕ. Унта Çĕрпỹ, Шăмăршă, Етĕрне, Вăрнар, Сĕнтĕрвăрри районĕсенчи пушар чаçĕсен командисем тупăшнă. Ăмăртусем хĕрỹ иртнĕ. Кашниех çĕнтерес кăмăлпа старта тухнă. Чи малтанах пушар хуралĕн ĕçченĕсем 100 метрлă дистанцире ăмăртнă. Кунта вăр-вар пулмалла, çав вăхăтрах пушар сỹнтермелли хатĕрсемпе лайăх ĕçлеме пĕлмелле, чăрмавсене çĕнтермелле. Чи пултарулли пирĕн район командинчи Динар Хамидуллин пулчĕ. Вăл пĕрремĕш вырăн йышăнчĕ. Андрей Жуков виççĕмĕш кăтартупа палăрчĕ. Тăсăлакан чикмекпе виççĕмĕш хута хăпарма çăмăл мар. Ку енĕпе те пирĕн пушар командинчи пушарниксем мала тухнă. Андрей Жуковпа Андрей Жирнова вăл енĕпе çитекен пулман. Вĕсем районта иртнĕ кăнтăр енчи пушар чаçĕсенчи спортсменсене те хыçа хăварнăччĕ. Пушар машинине шыв тултарса, вут-кăвара сỹнтермелли çанăсене (рукавсене) тăсса шыв сирпĕтсе ятарлă мечĕксене сапса антармалла. Ку конкурс вара чăннипех те пушар чаçĕсен командисем çулăмпа мĕнле кĕрешме пултарнине, инкек-синкеке епле сирмеллине ăнланнине тĕрĕслет. Пирĕн пушар хуралĕн ĕçченĕсем сĕнтĕрвăррисене пĕр çеккунт çеç выляса янă. Чи хумхануллă самант. Республика чемпионĕсем камсем? Пĕрремĕш вырăна районсем хушшинче иккĕмĕш çул ĕнтĕ Комсомольски районĕнчи пушар чаçĕнче ĕçлекенсем çĕнсе илнĕ. Апла пулсан, вĕсем чăннипех те ăстасем. Пирĕн район чысне Андрей Жирнов, Андрей Жуков, Юрий Иванов, Герман Крылов, Михаил Дряблов, Александр Антонов, Динар Хамидуллин пушар хуралĕн ĕçче-нĕсем хỹтĕленĕ. Вĕсемпе эпир чăннипех те мухтанма пултаратпăр. Комсомольскинчи 31-мĕш пушар чаçĕн команди С.А.Алексеев начальникĕн пулăшăвне туйса тăрать. Вăл пушар хуралĕнче ĕçлекенсене хавхалантарса пырать. Эпир районти пушар чаçĕнче ĕçлекенсене малашне те ăнăçу сунатпăр.