Августăн 17-мĕшĕнче Комсомольски территорилле суйлав комиссийĕн черетлĕ ларăвĕ иртрĕ. Кун йĕркине кĕртнĕ тĕп ыйтусен шутĕнче - Чăваш Республикин Патшалăх Канашне суйланма тăратнă кандидатсене регистрацилесси. Асăннă кун тĕлне кандидат пулас текен 4 çын комиссие хăйсен заявленийĕсене панă: Александр Сергеевич Кудряшов (Елчĕк районĕнчен), Кияметдин Садыртдинович Мифтахутдиновпа Геннадий Георгиевич Скворцов, Ильгиз Зелеевич Пахалов (виççĕшĕ те Комсомольски районĕнчен). Вĕсене "Патриоты России", "Пĕрлĕхлĕ Раççей", РФ коммунистсен, Раççей либерал-демократсен партийĕсен Чăваш Енри регион уйрăмĕсем тăратнă. Территорилле суйлав комиссийĕн председателĕ Николай Белков кашни кандидатпах кĕскен паллаштарчĕ. Комисси членĕсем виçĕ çынна - Г.Скворцова, А.Кудряшова, К.Мифтахутдинова пĕр саслă пулса регистрацилеме йышăнчĕç. И.Пахалов кандидатурине вара, документсене пуçтарса çитерменнипе, пăхса тухмарĕç. "Халăх тарçи" пулма шут тытнăскерсене Н.Белков председатель, комисси членĕсем ăшшăн саламларĕç, ăнăçу сунчĕç. Кандидатсем суйлав умĕнхи тапхăрта тĕрĕс, пĕр-пĕрне вараламасăр ĕçлеме сăмах пачĕç.