Уй-хирте Районти ял хуçалăх предприятийĕсенче кăçал 13480 гектар çине пĕрчĕллĕ тата пăрçа йышши тырăсем акса хăварнă. Августăн 24-мĕшĕ тĕлне 9158 гектар çинчи тырăсене вырнă. Вĕсенчен 8951 гектарне çапса тĕшĕленĕ. Йĕтемсем çине 190238 центнер тырă кĕнĕ. Хальлĕхе кашни гектар пуçне пĕрчĕллĕ тата пăрçа йышши тырăсен тухăçĕ 21,3 центнерпа танлашать. Районти хуçалăхсем кĕр тыррисем акаççĕ, вĕсем валли çĕр хатĕрлеççĕ. Пушаннă хирсенчен улăма çийĕнчех пуçтарса кĕртеççĕ. Районти ял хуçалăх кооперативĕсенче кĕрхи çĕртме тăвас ĕç те вăй илсе пырать.

Çурт-йĕрле пулас тесессен Тин çеç чăмăртаннă çемьесене çурт-йĕр çавăрма е хваттер туянма çăмăл мар. Çавна май патшалăх пулăшу пани темрен те паха. Президентăн çамрăк çемьесене пулăшас тĕллевлĕ программи чăн-чăн çăлăнăç. Вăл ĕçлеме пуçланăранпа, 2002 çултанпа, районти 56 çемье çурт-йĕрлĕ пулнă. Ипотека кредитне илес текенсем те пур. Çавăнпа та çамрăк çемьесен патшалăх тĕрлĕ енлĕн пулăшнă чухне çăмăллăхсемпе усă курмалла. Хăв çурт-йĕр çавăрма е хваттер туянма укçа-тенкĕ пухса çитериччен чылай вăхăт иртет тата ăна пуçтарса пыма çăмăл-и? Çук. Çамрăк мăшăрăн йыш хушăнсан пушшех те. Çавăнпа та пĕр тăхтаса тăмасăрах хăвăр пурăнакан ял поселенине васкăр, учета тăрăр. Хатĕр документсемпе район администрацине каймалла. Унта сире тĕллевлĕ программăсемпе тĕплĕнрех паллаштараççĕ. Паянхи номерте "Молодая семья" программа çинчен ăнлантарнине 4, 7-мĕш страницăсенче вулама пулать.

Хапăлласа туяннă Августăн 20-мĕшĕнче Шупашкар тата Шупашкар хули хăйĕн уявне паллă тунă. Çак кунах Николаев урамĕнче Чăваш Республикин апат-çимĕç фончĕн "Колос" ял хуçалăх пасарĕ уçăлнă. Унта республикăри тĕрлĕ районсенчи ял хуçалăх предприятийĕсем хăйсен таварĕсемпе çитнĕ. Пирĕн районти "Слава картофелю" агрофирма ООО та пушă алăпа кайман. Вĕсен "Ред скарлетт" тата ытти сортлă çĕрулмисене, кишĕрне тата ытти пахчаçимĕçне хапăлласах туяннă.