Сентябрĕн 8-мĕшĕнче Шупашкар районĕнчи Карачурара ăратлă выльăхсен куравĕ пулса иртрĕ. Çак курава "Восток" ял хуçалăх кооперативĕ ăратлă пăрусем тата сыснасем тăратрĕ. Пăрусене Мария Малышева, Константин Петров пăхаççĕ. Пăрусем хăйсен ăратлăхĕпе, тасалăхĕпе курава пухăннисене тĕлĕнтерчĕç. Темиçе районтан килнĕ ăратлă пăрусем хушшинче пĕрремĕш вырăн çĕнсе илсе "Востокăн" выльăхĕсем ылтăн медале тивĕçрĕç. Иртнĕ çул кĕмĕл медаль çĕнсе илнĕ- ччĕ. Вăрманхĕрри Чурачăкри сысна ферминчи сыснасем те ята ямарĕç. Александра Ятманова тата Валентина Петрова пăхакан сыснасем республикăра иккĕмĕш вырăн çĕнсе илчĕç, кĕмĕл медале тивĕç пулчĕç. Çакăн пек пысăк çи-тĕнỹсенче Елена Степанова тĕп зоотехникăн, Галина Федорова ветеринари ĕçченĕн, Елена Исаева техник-осеменаторăн тỹпи пĕчĕк мар. Вĕсем ăратлăхшăн ырми-канми тăрăшаççĕ. Вĕсене те тав сăмахĕ калас килет. Пĕтĕм ĕçе кооператив председателĕ Валерий Геннадьевич Михеев пĕлсе йĕркелесе пычĕ. Курава хутшăнакансене укçа-тенкĕпе, транспортпа тивĕçтерчĕ. Курава Чăваш Республикин Ял хуçалăх министерстви йĕркеленĕ, пĕтĕм условисем туса панă. Мала тухнисене укçан преми парса хавхалантарчĕç. Малти вырăнсем пире малашне тата лайăхрах ĕçлеме хавхалантараççĕ.