Çынна йĕркеллĕ, тухăçлă ĕçлеме мĕн кирлĕ? Чи пирваях, хăтлă ĕç вырăнĕ, лайăх условисем. Пĕрмаях çынсене йышăнакан организацисемшĕн çỹлерех асăннă япаласем уйрăмах пысăк пĕлтерĕшлĕ, мĕншĕн тесен тăвăр пỹлĕмсенче клиентсемпе ĕçлеме те кансĕр. Федераци налук службин Чăваш Республикинчи районсем хушшинчи 2-мĕш инспекцийĕн çурчĕ халиччен 2 хутлăччĕ. Кунта тăватă районти - Комсомольскинчи, Патăрьелĕнчи, Елчĕкри, Шăмăршăри - налук тỹлекенсене йышăннине шута илсен, мĕн каласси пур, чăннипех тăвăрччĕ. Пĕр пỹлĕмре налукçăсем темиçешерĕн ларатчĕç. Çитменнине, кашнин умĕнчех ком-пьютер, офисра усă куракан ытти техника. Пĕрне-пĕри чăрмантармасăр пулмастех ĕнтĕ кун пек чух. Çакна шута илсе Федераци налук службин Чăваш Республикинчи управленийĕ виççĕмĕш хутне çĕклеме йышăннă, укçи-тенкине федераллă бюджетран уйăрнă. Кăçал çулла В.Ф.Фарбер ертсе пыракан тулли мар яваплă "Строитель" организаци ĕçе пикенчĕ. Рабочисем кĕске хушăрах çурт ăшчиккине юсаса çĕнетрĕç, виççĕмĕш хутне хăпартса витсе хучĕç. Сентябрĕн 8-мĕшĕнче вара Федераци налук службин Чăваш Республикинчи районсем хушшинчи 2-мĕш инспекцийĕн çурчĕн презентацийĕ пулчĕ. Çак савăнăçлă саманта пирĕнпе пайлама Чăваш Республикин Президент Администрацийĕн руководителĕ Энвер Аблякимов, Федераци налук службин Чăваш Республикинчи управленийĕн ертỹçи Аркадий Дергачев, "Чувашрегионгаз" предприятин генеральнăй директорĕ Кияметдин Мифтахутдинов та килчĕç. Энвер Азизович хăйĕн саламлă сăмахĕнче Чăваш Енти, çав шутрах 2-мĕш инспекцири налукçăсен ĕçне пысăка хурса хакланине пĕлтерчĕ. Аркадий Дергачев налук службин ĕçĕнче нумай çĕнĕлĕх пулнине палăртрĕ. Акă, кăçалтан пуçласа организацисемпе предприятисем, предпринимательсем налук декларацийĕсене электронлă почтăпа ярса пама пултараççĕ. Çакă налук тỹлекенсемшĕн, уйрăмах ытти районсенчисемшĕн, питĕ меллĕ. Маларахри пек, инспекцине килсе вăхăт ирттерсе çỹремелле мар. Федераци налук службин Чăваш Республикинчи управленийĕн кашни районти инспекцийĕ хăтлă çуртсенче вырнаçнă. "Килес çул Патăрьелте те реконструкци ĕçĕсем тăвасшăн", - терĕ Аркадий Аверкиевич. Район пуçлăхĕ Геннадий Волков подрядлă организацие - "Строитель" фирмăна тата ун директорне Владимир Фарбера пахалăхлă ĕçшĕн тав турĕ, налукçăсене район бюджетне тултарассишĕн ăнăçлă ĕçлеме сунчĕ. Налук тỹлекенсем ячĕпе Тăманлă Выçлири кирпĕч завочĕн директорĕ Владимир Перьев калаçрĕ. Районти ачасен искусство шкулĕн воспитанникĕсемпе преподавателĕсем хаваслă юрă-ташă парнелерĕç. Ачасем çурт умĕнчи асфальт çинче "Налук тỹле те - лăпкă çывăр" темăпа ỹкерчĕксем тунă. Саламлă сăмахсем каланă тата тивĕçлисене тĕрлĕ ведомствăсен Хисеп грамотисене парса чысланă хыççăн кĕтнĕ самант çитрĕ. Юсаса çĕнетнĕ çурта кĕнĕ çĕре çыхнă хăйăва сумлă хăнасене - Э.Аблякимова, А.Дергачева, Г.Волкова - касма шанчĕç. Шала кĕнĕ хыççăн тĕлĕнмелли нумай пулчĕ. Пĕрремĕш хутри фойере клиентсене валли ятарлă компьютер лартса панă. Унпа кирек кам та ларса ĕçлеме, "Гарант", "Консультант плюс" программăсенче хăйне кирлĕ саккуна шыраса тупма, усă курма пултарать. Деклараци, уйăхсеренхи отчетсене йышăнакан специалистсене вара уйрăмшар кабина туса панă. Çакă бухгалтерсемшĕн те, налукçăсемшĕн те питĕ меллĕ, никам та чăрмантармасть. Фойерех налук тỹлекенсем валли стендсем пур. Кунта хăвна кирлĕ кирек мĕнле документ тĕслĕхне те тупма пулать. Иккĕмĕшпе виççĕмĕш этажсенчи кабинетсенче те çавăн пекех. Пĕр сăмахпа каласан, мĕнпур услови туса панă. Савăнса ĕçле те ĕçле, тăван республика, район аталанăвĕшĕн тăрăш. Çак çурта уçни тăватă районта пурăнакан налук тỹлекенсемшĕн тата налук инспекторĕсемшĕн чăннипех те пысăк уяв пулчĕ.