Сентябрĕн 11-мĕшĕнче пирĕн район пуçлăхĕпе Г.Волковпа Муркаш районĕн "Ударник" хуçалăхăн директорĕ П.Давыдов тата Çĕрпỹ районĕнчи "Колос" ФПУП ертỹçи А.Фадеев "Слава картофелю" агрофирма" АУОна çитсе курнă. Кунта çĕрулми 312 гектар çине лартнă. Паянхи куна 160 гектартан 6000 тонна "иккĕмĕш çăкăра" пуçтарса илнĕ. Вăтам тухăç 370 центнерпа танлашать, хăшпĕр вырăнсенче - 400-450-шер центнер. Çавăн пекех хăнасем кишĕр ани çине те çитсе курнă. Кунта вăл 20 гектар йышăнать. Агрофирма кишĕр туса илессипе пĕрремĕш çул çеç ĕçлет пулсан та, тухăçĕ унăн аван пулмалла. Малалла çул Йăлмахва ялне пулнă. Кунта сысна самăртакан комплекс пулнă вырăна çĕрулмипе кишĕре упрамалли хранилище хатĕрлеççĕ. Геннадий Федорович ĕçченсемпе тĕл пулса вĕсен ыйтăвĕсем çине туллин хуравланă, район территорийĕнче çул-йĕре юсас ыйту тавра калаçу пулнă. Хăнасем пĕр-пĕрин паха опычĕсемпе паллашнă. Тĕлпулу пуриншĕн те усăллă иртнĕ.