Ялсене симĕc  тум кĕртес енĕпе Комсомольски районĕнче конкурс иртрĕ. Çак ĕç малалла пырать. Акă, фермер хуçалăхĕн пуçлăхĕ М.Р. Минетуллин пуçарнипе  кăçал çуркунне кăна 20 пин ытла чăрăшпа хыр хунавĕ лартса  хăварнă. Минзекрем Равилович  малтан инженер-механикре, управляющире, совхоз директорĕнче ĕçленĕ. Халĕ  фермер /хресчен/ хаçалăхне ертсе пырать.

 Çак хуçалăх ĕлĕкрех  « Комсомольский» совхозчĕ. Кунта тĕп агрономра тата директор çумĕнче Вадим Васильевич Лисицын ĕçлерĕ. Анчах пурнăçĕ вăхăтсăр, сарăмсăр татăлчĕ. Çав çулсенче Виçпÿрт ялĕнчи бригадăна Назар Архипович Парков вăрçă ветеранĕ ертсе пычĕ. Вăл çут тĕнчерен уйрăлса кайсан Вадим Васильевич совхоз дирекцине çакăн пек сĕнÿ пачĕ: « Назар Архиповича халалласа  унăн килĕ хыçĕнчи çырма хĕрринче парк чĕртмелле». Кăçал çак пуçару-сĕнÿ пурнăçа кĕчĕ. Назар Архипович ячĕпе 4 гектар çине хырпа чăрăш лартса хăварнă. Çак ялтах В.В.Лисицына асăнса унăн ячĕпе 4 гектар çинче йывăç лартрĕç.  Ялти лавкка çывăхĕнче вара «Çамрăклăх» аллея уçрĕç. Халĕ унта та çур гектар çинче хырпа чăрăш хунавĕсем ÿсеççĕ. Хуçалăхăн  мехпаркĕ  çывăхĕнче  те кăçал йывăç чылай лартнă.

 Хуçалăхра А.Г.Николаев космонавта халалласа пĕр гектар çинче йывăç лартасшăн, парк валли вырăн та пур.

 Йывăçсем кĕçех тĕрекленме тытăнĕç, çулсерен вăй илсе пырĕç, ĕçре тăрăшнисене хăйсен çинчен аса илтерсе тăрĕç. Вăштăр-вăштăр çил вĕрнĕ май хумханса илеççĕ. Хăйсене лартса-пăхса ÿстерекенсене пуç тайса тав тунăн туйăнать.