Çемье пурнăçа пуянлатать, телей кỹрет. Çирĕп çемьерен килет те ĕнтĕ ачасен тата патшалăхăн пуласлăхĕ. Çемье мĕн чухлĕ çирĕпрех, пирĕн çĕршыв çавăн чухлĕ тĕреклĕрех. Çавăнпа та республикăра, районсенче кашни çулах "Çулталăк çемйи" конкурс йĕркелеççĕ. Пирĕн районта та çак конкурса ирттересси йăлана кĕнĕ. Кăçал вăл сентябрĕн 22-мĕшĕнче район администрацийĕн пысăк залĕнче иртрĕ. "Çулталăк çемйи - 2006" конкурса 3 çемье хутшăнма кăмăл турĕ. Уяв программине пилĕк çемье хутшăнмаллаччĕ те, анчах теме пула тепĕр икĕ мăшăр килсе çитеймерĕ. Районти культура пайĕн методика центрĕн руководителĕ В.Курицына уяв программине ертсе пынă май, вĕсене тĕрлĕ ĕçсем тума ыйтрĕ, камăн ĕçĕ чи лайăххине палăртаканни вара жюри пулчĕ. Пĕрремĕш конкурс мăшăрсем хăйсемпе паллаштарни пулчĕ. Анатолий Клементьевичпа Галина Ивановна Давыдовсем - Хирти Явăш ялĕнчен. Икĕ хĕрпе пĕр ывăл çитĕнтереççĕ, хăйсен пурнăçне çамрăк ăрăва пĕлỹ парассине халалланă. Галина Ивановна биологие, Анатолий Клементьевич физкультура предметне алла илме пулăшаççĕ. Вĕсем иккĕшĕ те спортпа туслă. Ачисене те мĕн пĕчĕкренех сывлăхлă пулччăр тесе спорта явăçтараççĕ. Кĕçĕн ывăлĕ Володя та пурнăçне спортпа çыхăнтарасшăн, Канашра пĕлỹ пухать. Мăнукĕ Диана та кукашшĕпе кукамăшĕнчен тĕслĕх илсе ỹсет. Давыдовсем Раççей, район шайĕнче иртнĕ спорт ăмăртăвĕсене хутшăнса япăх мар кăтартупа таврăннă. Шурутри Маковсем çемье телейне пĕр-пĕрне ăнланса яланах пулăшса пынинче, ĕçре те, канура та юнашар пулнинче кураççĕ. Вĕсен икĕ ывăл çитĕнет, Максимпа Алеша шкулта вĕренеççĕ. Венера - районти васкавлă пулăшу уйрăмĕн Шурутри филиалĕн фельдшерĕ. Шаннă ĕçре тỹрĕ чунпа тăрăшать. Владимир - районти васкавлă пулăшу уйрăмĕн Шурутри филиалĕн водителĕ. Вăл ĕçри ỹсĕмсемшĕн районти тĕп больница администрацийĕн Хисеп грамотине тивĕçнĕ. 2003 çулта Маковсен çемйи район администрацийĕпе Павел Семеновăн социаллă программин центрĕ йĕркеленĕ çемьесен спортпа сывлăха çирĕплетекен уявне хутшăнса пĕрремĕш вырăн йышăннă. Урмаел ялĕнчи Тукаевсем çапла калаççĕ: çемьере килĕшỹ хуçалансан, ĕçсем те ăнса пыраççĕ. Фаиляпа Нурисламăн хĕрпе ывăл çитĕнеççĕ. Кил хуçи хĕрарăмĕ - "Росгосстрах-Атăлçи" страхлакан компанин агенчĕ, мăшăрĕ - Урмаел шкулĕн вĕрентекенĕ. Мăшăрсем иккĕшĕ те юрра-ташша юратаççĕ. Зухра хĕрĕпе Азат ывăлĕ те ашшĕ-амăшĕн ырă тĕслĕхне ăша хывса ỹсеççĕ. Кунта вĕсем хăйсен илемлĕ сассипе пурне те тыткăна илчĕç. Пултарулăх конкурсĕнче мăшăрсен çемьепе çыхăннă тĕрлĕ ыйтусем çине хуравламалла пулчĕ. Çавăн пекех хăйсен ăсталăхне те кăтартрĕç. Чăвашла, тутарла юрă-сем шăрантарчĕç, шỹтсем каласа пачĕç. Кану самантĕнче культура çурчĕн ĕçченĕ Марина Волкова илемлĕ юрăсемпе пурне те саламларĕ. Конкурса хутшăнакансем жюрине хăйсен "Килти ĕçĕсемпе" те паллаштарчĕç. Вĕсем ятарлă çемье альбомĕ тунă. Тата тем тĕрлĕ апат-çимĕç те хатĕрлесе килнĕ конкурсантсем. Çимĕçсем пурте тутлă, техĕмлĕ çеç мар, илемĕпе те илĕртрĕç. Кунта жюрине чи лайăххине суйласа илме пĕрре те çăмăл пулмарĕ. Жюри комиссийĕнче район администрацийĕн пуçлăхĕн çумĕ Георгий Михайлович Киргизов, социаллă хỹтлĕх пайĕн заведующийĕ Ираида Алексеевна Никитина, культура енĕпе ĕçлекен специалист Зинаида Степановна Мельникова пулчĕç. Мăшăрсем никам та парнесĕр, Дипломсăр юлмарĕç. Маковсен çемйи "Дружная семья" ята çĕнсе илчĕ. Тукаевсем "Творческая семья" номинацире мала тухрĕç. Давыдовсен çемйи "Спортивная семья" приза тивĕç пулчĕ. Чи нумай сасă пухса вара "Çулталăк çемйи-2006" конкурсра Тукаевсем çĕнтерỹçĕсем пулчĕç. Вĕсен республикăри тупăшура район чысне хỹтĕлеме тивĕ. Мĕнех, эпир вĕсене ăнăçу сунатпăр. Çитес çулти конкурса туслă, килĕштерсе пурăнакан çемьесем кашни ял поселенийĕсенченех хутшăнасса, айккинче тăрса юлмасса шанас килет.