Иртнĕ вырсарникун, октябрĕн 1-мĕшĕнче, район центрне çăмăл атлетикăна кăмăллакансем нумайăн пухăнчĕç. Чылайранпа пыракан йăлапа, спортсменсем район хаçачĕн парнисене çĕнсе илессишĕн старта тухрĕç. Çак ăмăртусене çуллахи спорт сезонĕ хупăннине те халалланă. Эстафетăлла ăмăртусене хутшăнма районти шкулсем пурте килнĕ. Унсăр пуçне, организацисемпе предприятисем те хăйсен командисене тăратнă. Районти вĕрентỹ управленийĕн начальникĕ, ăмăртусен тĕп судйи Николай Максимов, район хаçачĕн тĕп редакторĕ Любовь Шуряшкина, райадминистрацин спортпа физкультура енĕпе ĕçлекен тĕп специалисчĕ Евгений Тихонов спортсменсене ăшшăн саламларĕç, ăнăçлă тупăшма сунчĕç. Старта чи малтан пĕтĕмĕшле пĕлỹ паракан тĕп шкулсенче вĕренекен арçын ачасем тухрĕç. Вĕсен район центрĕнчи парк тавра чупса килмелле те эстафета патакне хăйсен командинчи хĕрачана памалла. Ку ушкăнра пĕлтĕрхи çĕнтерỹçĕсемех - Александровка шкулĕн спортсменĕсем мала тухрĕç. Иккĕмĕш вырăн - Хырхĕрри шкулĕн командин. Йăлмахва тĕп шкулĕн çăмăл атлечĕсем виççĕмĕш вырăна тивĕçрĕç. Унтан старта вăтам шкулсенче кĕçĕнрех классенче вĕренекенсем тухрĕç. Кунта вара Анат Тимĕрчкасси вăтам шкулĕн команди чи пултарулли пулчĕ. Иккĕмĕш вырăн - Комсомольски 1-мĕш шкулĕн. Хирти Явăш вăтам шкулĕн спортсменĕсем финиша виççĕмĕш çитрĕç. Стартра - вăтам шкулсен командисем. Куракансем, юлташĕсем тата физкультура учителĕсем атлетсене чунтан хавхалантарма тăрăшрĕç: кăшкăрчĕç, пĕрле чупрĕç... Ку ушкăнра та Анат Тимĕрчкасси спортсменĕсем чи çивĕччисем пулчĕç, пĕрремĕш вырăна алăран вĕçертмерĕç. Иккĕмĕш вырăн - асанкассисен (иртнĕ çул вĕсем пĕрремĕшчĕ), виççĕмĕш - нĕркеçсем. Предприятисемпе организацисенчен командăсем нумаях пулмарĕç, çапах вĕсем пурте çĕнтерỹ патне ăнтăлчĕç. Эльпуç ял поселени территори-йĕнчен ăмăртусене виçĕ команда килсе çитнĕ: "Дружба-1", "Дружба-2" тата поселени представителĕсем. Шурут тата Хирти Сĕнтĕр поселенийĕсем те эстафетăна хутшăнма кăмăл тунă. Ку ушкăнра чи вăйлисем шурутсем пулчĕç, дистанцие малтан вĕçлерĕç. Финиша иккĕмĕш çитекенни "Дружба" ЯХПК команди пулчĕ, ăна Ремис Мансуров председатель ертсе пычĕ. Эльпуç ял поселенийĕн спортсменĕсем виççĕмĕш вырăна тивĕçрĕç. Пĕрремĕш вырăна тухнă командăсене район хаçачĕн редакцийĕ грамотăпа, куçса çỹрекен кубоксемпе чысларĕ. Кунсăр пуçне, вĕсем 2007 çулхи пĕрремĕш çур çулта "Каçал ене" тỹлевсĕр илсе тăрĕç. Пĕрремĕш-виççĕмĕш вырăн йышăннисене вара пылак парне - торт тивĕçрĕ. Пĕтĕмлетỹсем тăрăх, чи хăвăрт чупакан спортсмен Анат Тимĕрчкасси вăтам шкулĕн спортсменĕ Эдуард Иванов пулчĕ. Ăна суд приставĕсен районти уйрăмĕн начальникĕ Мария Илларионова ятарлă парнепе чысларĕ.