Юлашки çулсенче ятарлă медицина центрĕсем уçас, ялти медицина системине çĕнетес енĕпе Чăваш Енре тăрăшса ĕçлеççĕ. Пирĕн республика медицина пулăшăвĕ парас, пĕтĕмĕшле практика врачĕн офисĕсене уçас енĕпе Раççейре малтисен ретĕнче. Октябрĕн 4-мĕшĕнче Кĕçĕн Каçал ялĕнче пĕтĕмĕшле практика врачĕн уйрăмне савăнăçлă лару-тăрура ЧР сывлăха сыхлас ĕç министрĕ Н.Суслонова, район пуçлăхĕ Г.Ф.Волков, район больницин тĕп врачĕ М.Федорова тата медицина участокĕн ĕçтешĕсем уçрĕç. Хĕрлĕ хăйăва Н.Суслоновăпа Г.Волков касрĕç. Ку уйрăм Чăваш Республикинче -- 333-мĕш, районĕпе вара 6-мĕш. Малашне пĕтĕмĕшле практика врачĕн (çемье) уйрăмĕнче таврари Эткер, Хырхĕрри, Вăрманхĕрри Чурачăк, Асанкасси ялĕсенчи çынсем е 1081 çемье тивĕçлĕ медицина пулăшăвĕ илме пултараççĕ. Çĕнĕ офис уçăлнă май врачсен паха пулăшăвĕ ялсенче пурăнакансем тата ĕçлекенсем патне май пур таран çывхарчĕ. Халĕ çынсем вак-тĕвек ыйтусемпе район больницине çула тухмĕç. Вĕсен ыйтăвне Кĕçĕн Каçалти уйрăмра вăй хуракан медицина ĕçченĕсем тивĕçтерĕç. Пĕтĕмĕшле практика врачĕн уйрăмĕн тĕп врачĕ пулма Р.Муравьевăна çирĕплетнĕ. Вăл - пĕрремĕш категориллĕ тухтăр. Пĕтĕмĕшле практика врачĕн уйрăмне ял халăхне тивĕçлĕ медицина пулăшăвĕ пама кабинетсене çĕнĕ йышши медицина оборудованийĕсемпе, компьютер техникипе пуянлатнă. Унта кашнинех хапăл туса йышăнаççĕ.