Чỹк уйăхĕн 10-мĕшĕнче шалти ĕçсен органĕсенче ĕçлекенсем хăйсен уявне паллă турĕç. Вĕсем куллен ĕçре, кану кунĕсенче те йĕркелĕх хура-лĕнче, постра. Пакунлă çын яланах хỹтĕлессе шанатпăр, вĕсем пирки иккĕленместпĕр. Уяв кунĕ районти культурăпа кану центрне милици ĕçче-нĕсем, куракансем йышлăн пухăнчĕç. Чи малтанах район пуçлăхĕ Г.Ф.Волков йĕрке хуралçисене уяв ячĕпе саламларĕ. Ĕçре ăнăçусем сунчĕ. Унтан шалти ĕçсен пайĕн начальникĕ Ю.Н.Егоров милици сотрудникĕсене, ветерансене ăшшăн саламларĕ. ШĔП ĕçĕ-хĕлĕ çинче чарăнса тăчĕ. Тăрăшса ĕçлекенсене палăртрĕ, Хисеп грамотисем пачĕ, тав турĕ. "Суперполицейский" конкурс уява малалла тăсрĕ. Районти шалти ĕçсен пайĕнче ĕçлекен 5 сотрудник конкурса хутшăнса, хăйсен ăсталăхне тĕрĕслерĕç. Вĕсем: А.Артемьев, А.Козлов - патрульпе пост службин милиционерĕсем, А.Марин - милиционер-водитель, С.Дубков - лицензипе регистраци службин инспекторĕ, М.Ильин - участок инспекторĕ. Вĕсене пурте кăмăллăн алă çупса кĕтсе илчĕç. Чи малтанах каччăсем хăйсен вăйне кăтартрĕç. Вĕсем урайĕнчен алă вăйĕпе кĕлеткене çĕклес енĕпе тупăшрĕç. Чи маттурри Михаил Ильин пулчĕ. Кĕске вăхăтрах 49 хутчен кĕлеткине çĕклеме пултарчĕ. Оперуполномоченнăй сăмахран тĕрлĕ сăмах тупни те интереслĕ пулчĕ. Кунта та М.Ильин палăрчĕ. Конкурссем хушшинче О.Буслаева, М.Шумилкина, Л.Носова, А.Кокшина çепĕç юрăсем шăрантарчĕç, искусство шкулĕн вĕренекенĕсем ташăсемпе савăнтарчĕç. Ухăран тĕл пересси сотрудниксемшĕн çăмăл пулмарĕ. Тĕллесен те сăннисем айккинелле вĕçрĕç. Тĕрлĕ лару-тăрăва хакласа, унтан çаврăнса тухма пултарассине тĕрĕслерĕç. Пурте маттуррине палăртмалла, çухалса каякансем пулмарĕç. Кулса, шỹтлесе, йĕплесе те пулин лару-тăрури ыйтусене кĕске вăхăтра татса пачĕç. Вĕсем кулленхи йывăр та пăтăрмахлă ĕçре çухалса кайманнине çирĕплетсех калама пулать. М.Илларионова, А.Ларионов, Р.Суратова жюри членĕсене конкурса пĕтĕмлетме, çĕнтерỹçĕсене палăртма çăмăл пулмарĕ. Çапах та А.Марин - патрульпе пост службин милиционер-водителĕ, "Суперполицейский" ята тивĕçрĕ. М.Ильин участок инспекторĕ куракансен кăмăлне кайрĕ, "Мистер зрительских симпатий" пулчĕ. А.Артемьев "Мистер обояние", А.Козлов "Мистер ум", С.Дубков - "Мистер-сила" ята тивĕçрĕç. Вĕсене пурне те асăнмалăх парнесем пачĕç. Милици ĕçченĕсем ĕçре çеç мар, сцена çинче те маттур! А.ЕФРЕМОВА.