Ентешĕн, Совет Союзĕн Геройĕн Федор Черновăн ятне ĕмĕрлĕхе асра хăварас тесе Асанкасси ялĕнче 16 çул каялла ун ячĕпе ирĕклĕ майпа кĕрешекенсен турнирне ирттерессине пуçарса янă. Паянхи кун та манăçмасть çак ырă йăла. Манăçма мар, вăй илсе, анлăланса пырать тесен тĕрĕсрех пулать пуль. Асăннă турнирта пĕрремĕш хут кавир çине тухнисем халь самаях çулланнă пулин те, паянхи кун вĕсен шăллĕсем, ывăлĕсем кĕрешеççĕ, çĕнтереççĕ, тăван ял чысне ямаççĕ. Ăмăртусене йĕркелесе ирттерме яланах пулăшма хатĕррисем те йышлăн ялта. Турнира пуçараканĕ Геннадий Петухов çулĕпе кайнисем унăн вĕренекенĕсем хушшинче те пур. Акă, тăван шкултах Вячеслав Яндров ирĕклĕ майпа кĕрешессин вăрттăнлăхĕсене ачасене вĕрентет, Валерий Денисов халь Анат Тимĕрчкасси шкулĕнче секци ертсе пырать. Геннадий Николаевич тренер хатĕрлентернипе 2 спорт мастерĕ, спорт мастерĕн 8 кандидачĕ тухнă Асанкасси ялĕнчен. Арçын ачасем çеç мар, хĕрсем те кăмăллаççĕ спортăн çак енне. Акă, Оля Денисова ачаранах кавир çине тухма пуçланă. Ăсталăхне кунран-кун туптаса пырса хĕрача республикăра кăна мар, Раççей ша-йĕнчи турнирсене те хутшăннă. Раççей чемпионкин ятне те тивĕçнĕ Ольга. Кĕрешỹре палăрнисем татах та йышлă.Вĕсем пурте хăйсен юратнă учительне, тренерне спорт çулĕ çине тăратнăшăн паян кун та тав сăмахĕсем калаççĕ. "Чăваш Республикин тава тивĕçлĕ учителĕ" ята чăннипех те тивĕçлĕ Геннадий Николаевич. Кăçалхи республика турнирĕ ноябрĕн 18-мĕшĕнче пулчĕ. Ăна уçнă çĕре район пуçлăхĕ Г.Волков, "Луч" ЯХПК председателĕ, спорт тусĕ А.Капитонов, ирĕклĕ майпа кĕрешессипе республика чемпионĕ А.Сергеев, самбо енĕпе икĕ хутчен тĕнче чемпионĕ пулнă А.Колесников, ирĕклĕ майпа кĕрешекенсен республикăри федерацийĕн аслă тренерĕ В.Семенов тата ыттисем хутшăнчĕç. Турнира хамăр районти Комсомольски, Тăманлă Выçли, Анат Тимĕрчкасси, Асанкасси шкулĕсенчен, Ульяновск облаçĕнчи Нагаткинăран, Шупашкар, Канаш хулисенчен 100 ытла спортсмен хутшăнчĕ. Арçын ачасем 8 виçе категорийĕнче, хĕрачасем пĕр виçе категорийĕнче тупăшрĕç. 32 килограмлисем хушшинче Чĕмпĕр облаçĕнчи Нагаткинăран килнĕ Саша Горохин çĕнтерỹçĕ пулса тăчĕ. Иккĕмĕш вырăнта - Федя Злых (Канаш), виççĕмĕш вырăн хуçи - Анат Тимĕрчкасси çамрăк атлечĕ Саша Леонтьев. 35, 38, 42, 58, 63 килограмлисем хушшинче те пĕрремĕш вырăнта Шупашкар, Канаш хулисенчен килнĕ кĕрешỹçĕсем пулчĕç. 54, 55 килограмлă виçеллисенчен вара Асанкасси каччисем Николай Мироновпа Алексей Яндров пĕрремĕш вырăна хăйсенчен вĕçертмерĕç. Тăманлă Выçлири Андрей Кочановпа (35 кг) Сергей Тумаков (55 кг), Асанкассинчи Слава Герасимов (42 кг), Саша Максимов (58 кг), Владик Иванов (63 кг) хăйсен виçисенче иккĕмĕш вырăна тухрĕç. Виççĕмĕш вырăн йышăннисем хушшинче - Дима Алексеев (Анат Тимĕрчкасси, 55 кг). Хĕрачасем хушшинче пĕрремĕш приз Шупашкар хулинчи Н.Федоровăна лекрĕ, иккĕмĕш вырăнта - Асанкасси хĕрĕ Настя Митюкова, Катя Николаева (Анат Тимĕрчкасси) виççĕмĕш приза тивĕçрĕ. Çĕнтерỹçĕсене Чăваш Республикин физкультурăпа спорт министерствин Дипломĕсемпе, хаклă парнесемпе чысларĕç. Спортсменсене пурне те шкул столовăйĕнче вĕри апатпа сăйларĕç. Асанкасси вăтам шкулĕнчи физкультура учителĕн Геннадий Петуховăн çак кунсенче çур ĕмĕрхи юбилей. Юбиляра районти шкулсенчи ĕçтешĕсем, аякран килнĕ хăнасем, Асанкасси ял поселенийĕн, "Асаново" ЯХПК правлени коллективĕсем ăшшăн саламларĕç. Ырлăх-сывлăх та вăрăм кун-çул, тата пысăк çитĕнỹсем тума ăнăçу сунчĕç. Вĕренекенĕсем кăмăлтан каланă ырă тав сăмахĕсем, ăна иккĕмĕш ашшĕ вырăнне хурса хисеплени учителĕн чĕри патнех пычĕç.