Ялта пурăнакансен хушшинче сывă пурнăç йĕркине ытларах сарас тесе «Урожай» спорт обществи тăтăшах тĕрлĕ ăмăрту ирттерет. Армрестлинг енĕпе обществăн  призĕсене çĕнсе илессишĕн Комсомольскинчи турнира республикăри сакăр районтан пынă 80 спортсмен хутшăннă. Тупăшу пуçланас умĕн вĕсене армспортăн республикăри федерацийĕн ертÿçи И.Смоленцев, «Урожай» обществăн ĕç тăвакан директорĕ А.Осипов, Комсомольски район пуçлăхĕ  Г.Волков, райадминистрацин вĕрентÿ управленийĕн пуçлăхĕ Н.Максимов саламланă, çĕнтерме ырă суннă. 

 Армспорт чемпионатне  кăçал кунта ирттерни ахальтен мар. Каçал тăрăхĕнче спортăн ку енне кăмăллакан çав тери  нумай. Хальхи çивĕч тупăшура  та район çамрăкĕсем ытларах  медальлĕ пулчĕç, иккĕмĕш çул чемпионатăн тĕп призне – Кубока – çĕнсе илчĕç. Иккĕмĕшпе виççĕмĕш вырăнсенче – Елчĕксемпе Патăрьелсем. Уйрăм спортсменсенчен хăйсен виçе категорийĕсенче Ю.Яковлева, Д.Тимофеев, И.Табаев, Р.Хамбиков, М.Каримуллин чемпион ятне тивĕçрĕç. Турнирăн абсолютлă чемпионĕ – Каçал тăрăхĕн пăхаттирĕ Марат Каримуллин.