Çулталăк вĕçленсе пырать. 2006 çула ЧР Президенчĕ Н.Федоров "Ăс-хакăл çутлăхĕн çулталăкĕ" тесе палăртнăччĕ. Çак енĕпе районта нумай ĕç тунă. Район пуçлăхĕн çумĕ, вĕрентỹ управленийĕн начальникĕ Н.А.Максимов районти депутатсен Пухăвĕн депутачĕсем умĕнче кăçал йĕркеленĕ мероприятисем пирки каласа пачĕ. Малтанах çак енĕпе ятарлă план хатĕрленĕ пулнă. Районти ĕçсене çавăнпа килĕшỹллĕн туса пынă. Культура, вĕрентỹ, сывлăха сыхлас ĕç учрежденийĕсем, предприятисемпе организацисем чылай мероприяти ирттернĕ. Районти "Çĕр тата çынсем" музейра паллă художникăн И.Айвазовскин картинисен, "Чăваш тĕррисен" тата ытти куравĕсем иртнĕ. Унта çĕршер çын пырса илемлĕхпе паллашнă. Районти моделлĕ тĕп библиотека, ялти библиотекăсем тăтăшах конкурссем, уяв каçĕсем, кĕнеке выставкисем, тĕлпулусем йĕркеленĕ. Унта чылай çын, ачасем хутшăннă. Район центрĕнчи культурăпа кану центрĕнче, ялсенчи культура çурчĕсемпе клубсенче те концертсем тата ытти каçсем те пулса иртнĕ. Республикăри ачасен эстрада юррисен III фестивальне пирĕн районти талантлă вĕренекенсем хастар хутшăннă. "Каçал" фольклор ансамблĕ ялсенче çеç мар, Ульяновск облаçĕнчи Павловка поселокĕнче иртнĕ наци культурин регионсем хушшинчи "Поволжская глубинка" фестивальне хутшăнса хăйĕн пултарулăхне кăтартнă. Пур меро-приятине асăнса та пĕтереймĕн. Вĕсем пурте çынсен ыйтăвне, тавракурăмне ỹстерес, кăмăл-сипет енĕпе лару-тăрăва лайăхлатас, илемлĕхе туйма хăнăхтарассипе çыхăннă. Уйрăмах çакă ачасемшĕн, çамрăксемшĕн паха. Мероприятисем вĕсене малашнехи пурнăçра пулăшаççех. Çитес çула РФ Президенчĕ В.Путин "Кĕнеке çулталăкĕ", ЧР Президенчĕ Н.Федоров "Ача çулталăкĕ" тесе палăртнă. Çаксене çамрăк ăрăва тĕрĕс воспитани парас, кăмăл-сипет енчен лайăх енне улăштарма пулăшас тĕлĕшпе тăваççĕ. Асăннă çулталăксем хăйсен çимĕçне памаллах.