Çак кунсенче районти выльăх-чĕрлĕх отраслĕнче ĕçлекенсем çулталăк пĕтĕмлетĕвĕсене пăхса тухма пуçтарăнчĕç. Канашлу ĕçне район пуçлăхĕ Г.Ф.Волков, ял хуçалăх пайĕн начальникĕ Г.М.Киргизов, ял хуçалăх предприятийĕсен ертỹçисем те хутшăнчĕç. Малтанах ял хуçалăх пайĕн тĕп зоотехникĕ К.Г.Гимальдинов районти фермăсем мĕнле ĕçлесе пыни пирки доклад туса пачĕ. Чылай енĕпе хуçалăхсем иртнĕ çул лайăх ĕçленĕ. Тăрăшмалли татах та пур. Районти ветстанци начальникĕ Р.М.Велимухаметов выльăхсен чир-чĕрĕ пирки чарăнса тăчĕ. Пĕлтĕр районта хăрушă инфекциллĕ чирсем сиксе тухман, профилактика енĕпе ĕçсене вăхăтра тата пахалăхлă пурнăçлама тăрăшнă. Ăратлăх енĕпе ĕçлекен тĕп зоотехник Н.И.Емельянов сăмах илсе ăратлăх енĕпе ĕçсем мĕнле пулса пынипе паллаштарнă. Канашлура район пуçлăхĕ Г.Волков, Г.Киргизов тухса калаçнă, выльăх-чĕрлĕх отраслĕ пирки хăйсен шухăшĕсене палăртнă. Çавăн пекех "Рассвет", "Труд" ял хуçалăх кооперативĕ-сен председателĕсем М.Р. Афанасьев, В.П.Николаев, "Урожай" колхоз председателĕ А.Н.Ершов сăмах илнĕ, кирлĕ сĕнỹсем панă. Выльăх-чĕрлĕх отрасльне аталантарас енĕпе ĕçлемеллине палăртнă.