Районти ĕçпе тивĕçтерекен центра куллен çын килет. Кашнинех мĕнле те пулин пулăшу пама тăрăшатпăр. Ĕç вырăнĕсем сĕнетпĕр, чылайăшне вĕрентсе кăларатпăр. Акă, февраль уйăхĕн 1-мĕшĕнчен 2 ушкăн парта хушшине ларчĕ. Вĕсем электрогазосварщик, тракторист-машинист профессийĕллĕ пулĕç. ЧР Ял хуçалăх министерствин "Вĕренỹ курсĕсен комбиначĕн" преподавателĕсем района килсех вĕрентеççĕ. Çавна май вĕренекенсен район тулашне тухмасăр, укçа-тенкĕ тăкакламасăр алла специальность илме пулать. Специальноçсăр çынсене, уйрăмах çамрăксене, профессиллĕ пулин те ĕçе вырнаçайманнисене вĕренме яратпăр. Хушма професси илни вĕсене малашне ĕç вырăнĕ тупма пулăшĕ. Ĕçпе тивĕçтерекен центрти ĕçченсем те вĕсене яланах пулăшма хатĕр. Пирĕн центр вĕрентсе кăларнă специалистсем халĕ ял хуçалăх предприятийĕсенче ĕçлеççĕ. Çураки çитнĕ май, уйрăмах тракторист-машинистсем çитменни палăрать. Вĕсем çулĕсемпе те ватăлса пыраççĕ, тивĕçлĕ канăва каяççĕ. Механизаторсене улăштарма çамрăксем кирлĕ. Эпир тỹлевсĕрех вĕрентетпĕр-çке. Ĕçпе тивĕçтерекен центра çеç килмелле. Килĕр, ỹкĕнмĕр. Газоэлектросварщика, тракториста вĕренни питĕ кирлĕ. Çак специальноçсем ĕмĕр тăршшĕпех сирĕн пурнăçра пулăшса пырĕç.