Чăваш Республикин Президенчĕ Н.Федоров февралĕн 5-мĕшĕнче пултарулăха туптакан республикăри çамрăксене ятарлă стипенди парасси çинчен калакан хушу çине алă пуснă. Вĕренỹре, бизнес проекчĕ тăвас, ăслăлăхпа производствăра тата управлени ĕç-хĕлĕнче пысăк ỹсĕм тунă каччăсемпе хĕрсем кашни уйăхра 1000 тенкĕ илсе тăрĕç. Вĕсен йышĕнче пирĕн районти çамрăксем те пур. Районти ача-пăча искусство шкулĕн художество пултарулăх уйрăмĕн преподавателĕ Надежда Владимировна Абдюшева, Наталия Владимировна Михайлова вĕренекен çак чыса тивĕçнĕ. Вĕсем районти, республикăри мероприятисенче хăйсене лайăх енчен палăртнă. Районти "Инициатива" обществăн пĕрлешĕвĕн руководителĕн çумĕ Эдуард Владимирович Алексеев та кăçалтан Президент стипендине илсе тăма пуçлĕ. Стипендиатсен шутĕнче: "Комсомольский РСУ" ХАОн штукатур-малярĕ Ирина Геннадьевна Воробьева, Чăваш Республикинчи ирĕклĕ майпа кĕрешекенсен "Кĕрешỹ" федерацийĕн членĕ Дмитрий Валерьевич Денисов, район администрацийĕн çамрăксем енĕ-пе ĕçлекен специалисчĕ Эльмира Джаудатовна Зинатуллина, Тăманлă Выçли вăтам шкулĕнче акăлчан чĕлхине вĕрентекен Александр Николаевич Николаев, Комсомольски 1-мĕш вăтам шкулĕнчи хими учителĕ Петр Васильевич Родионов пур. Ял хуçалăх производствинче тăрăшакан "Асаново" ял хуçалăх кооперативĕн тракторисчĕ Роман Николаевич Сушков, "Кызыл сабанча" фермер хуçалăхĕн водителĕ Марсель Зиядинович Шамсутдинов хастар ĕçшĕн, пултаруллă пулнăшăн вăл хисепе тивĕçнĕ. Ял хуçалăх потребительсен "ТАН" кредит кооперативĕн инспекторне Лилия Минадиевна Яфизована та стипендиатсен шутне кĕнĕшĕн саламлатпăр. Тепĕр ырă хыпар: пирĕн районта çуралса ỹснĕ, спортра ăнăçусем тăвакан Алевтина Вениаминовна Биктимирова та Президент стипендиачĕсен йышĕнче. Пултаруллă çамрăксене ăнăçу сунатпăр. Районти тĕрлĕ организацисенче, предприятисенче, учрежденисенче хастар яшсемпе хĕрсем чылайăн ĕçлеççĕ. Çитес çулсенче вĕсенчен чи тивĕçлисем те çак стипендиллĕ пуласса шанас килет.