Пирĕн районта ялсенчи клубсемпе культура çурчĕсенче 296 пултарулăх ушкăнĕ шутланать. Çав вăхăтрах вĕсенчен 7 ушкăнĕ хăйĕн пултарулăхне кура "халăх" ятне çĕнсе илнĕ. Районти культурăпа кану центрĕ çумĕнче 4 коллектив: халăх театрĕ (режиссерĕ Валентина Краснова), "Каçал" халăх фольклор ансамблĕ (пултарулăх ертỹçи Владимир Павлов) халăх юрăпа ташă ансамблĕ (ертỹçи Альбина Кокшина), халăх эстрада студийĕ (Виктор Кокшин). Кашни виçĕ çулта пĕрре ушкăнсем хайсен пултарулăхне ятарлă жюри умĕнче çирĕплетсе кăтартса параççĕ. Пуш уйăхĕн 2-мĕш тата 4-мĕш кунĕсенче Комсомольскинчи культурăпа кану центрĕнче "халăх коллективĕ" ятне илнĕ ушкăнсем пысăк концерт программисемпе хăйсене хỹтĕлĕç. Çак ĕçе тĕплĕн хатĕрленнĕ май чылай ялта пулса пысăк концертсемпе халăха савăнтарчĕç. Иртнĕ кунсенче Виçпỹртри, Кивĕ Сĕнтĕрти, Аслă Чурачăкри, Тукайри культура çурчĕсенче çынсем вĕсене курса киленчĕç. Çавăн пекех Йỹç Шăхалĕнчи, Елчĕк районĕнчи Курнавăш çыннисемпе тĕлпулу пулчĕ. Пултаруллă юрăçсене, артистсене, ташă ăстисене кашни ялтах ăшă кăмăлпа йышăнчĕç, вĕсене малашне те ăнăçу та çитĕнỹ сунчĕç.