Çемьене укçа илсе килес, ытлă-çитлĕ пурăнас тесе тесе чăваш арĕ таçта ĕçлеме те хатĕр, ытларах тỹлеччĕр кăна. Февралĕн 28-мĕшĕнче Мускаври çавра çул çинче аварие лекнĕ "Фиат" автобусра та ĕçлеме кайнă 18 ентеш пулнă. Транспорт бетон блокĕ çине пырса тăрăнса тỹнсе кайнă, автобусри 11 пассажир аманнă. Мартăн 1-мĕшĕнче вĕсенчен пĕри, Çĕнĕ Мăратра пурăннăскер, Мускаври больницăра вилнĕ. Йывăр аманнисем хушшинче -Вутлан ялĕнчи икĕ арçын. Пĕчĕк автобус водителĕ, пуç мимине чĕтретнĕскер, Шупашкара таврăннă, васкавлă медпулăшу паракан больницăра выртать.

Çак инкек çинчен тунтикун Чăваш Ен пуçлăхĕ ирттернĕ планеркăра сỹтсе явнă. Михаил Игнатьев правительство комиссийĕ пухма, лару-тăрăва тишкернĕ хыççăн информацие муниципалитет пуçлăхĕсем патне çитерме хушнă. Чăваш Ен полицейскийĕсем инкек сăлтавне тĕпчеççĕ.