Апрелĕн 12-мĕшĕнче православи тĕнне ĕненекенсем Мăнкуна уявлаççĕ. Çавна май районти чиркỹсенче службăсем иртеççĕ. Çак вăхăтра вара уйрăмах асăрхануллă пулмалла. Вырăнти лару-тăрупа паллашас, профилактика калаçăвĕсем ирттерес тесе районти 31-мĕш пушар чаçĕн, чрезвычайлă лару-тăру, патшалăх пушар надзорĕн специалисчĕсем чиркỹсен настоятелĕсемпе тĕл пулчĕç.

Калаçу ирттернĕ май специалистсем чиркỹ ĕçченĕсене пушар хăрушсăрлăхĕн правилисене пăхăнма чĕнсе каларĕç. Енчен те вут-кăвар тухас пулсассăн чи малтанах мĕн тумаллине, çынсене эвакуацилеме пĕлнине тĕрĕслесе практика занятийĕ те ирттерчĕç.

Мăнкунра инкек ан пултăр тесессĕн прихут çыннисен çак правилăсене çирĕп пăхăнмалла:

- хăвăрт çунакан япаласем çывăхĕнче çурта çунтарма юрамасть;

- çунакан çуртасене лартнă чухне асăрхануллă пулăр, вĕсене ỹкме ан парăр;

- пушар тухма пултарнине сиссен тỹрех чиркỹре дежурствăра тăракан пушар ĕçченне е 112 номерпе шăнкăравласа пĕлтермелле;

- "пушар" тесе кăшкăрнине илтсен сехĕрленсе ỹкмелле мар. Васкамасăр, чи малтан ваттисемпе ачасене пулăшса çуртран тухмалла.

Уяв пуриншĕн те хаваслă ирттĕр.

А.СОРОКИН,

районти пушар надзорĕн уйрăмĕн начальникĕ.