1927-1932 çулсем - пĕрремĕш тĕнче тата граждан вăрçи хыççăн юхăннă-арканнă халăх хуçалăхне ура çине тăратассишĕн ырми-канми тăрăшнă вăхăт. Ун чухне чăваш халăхĕн 90 проценчĕ хутла пĕлмен. Шăпах çак вăхăтра чăваш хĕрĕ Татьяна Бурашникова (кайран актриса Тани Юн ятпа палăрнă) тата И.Максимов-Кошкинский режиссер хăш-пĕр хуласенче киностудисем йĕркелени çинчен вуласа пĕлнĕ хыççăн Чăваш Енре кино ỹкерес ĕçе йĕркелес ыйтупа ĕçлеме пуçлаççĕ. Тăрăшни сая кайман - "Чăвашкино" студи ĕçле-ме пуçланă. Часах студи хатĕрленĕ илемлĕ, документлă фильмсем çĕр-шыв экранĕсем çине тухнă.

Тани Юн çырнă "Иртнĕ кун-çулсем" аса илỹ кĕнекинче студи кун-çулĕпе, ĕçĕ-хĕлĕпе туллин паллашма пулать. Çамрăксене те, ваттисене те çак кĕнекене вуласа тухма сĕнесшĕн. Чăваш культурине, искусствине ỹстерес ĕçре çамрăксене Тани Юн пек хастар пулма сĕнетĕп.

Р.МОИСЕЕВ