АЛ ĔÇ ĂСТИСЕМ Акатуя килнисем Ăстаçăсен хулинчи экспонатсемпе интересленсех паллашрĕç. Акă, Хырхĕрри вăтам шкулĕнчи Н.Вахитова ертсе пыракан "Золушка" кружока çỹрекен ачасем чĕнтĕр йĕппипе çыхнă салфеткăсемпе тĕрлĕ япаласем мĕн тери хитре те илемлĕ. Г.Петров çак шкулта ачасене физика предмечĕпе вĕрентет, тарăн та çирĕп пĕлỹ пама тăрăшать. Геннадий Николаевич _ ал ĕç ăсти те. Вăл ăсталанă чăваш халăхĕн музыка инструменчĕсене уява килнисем пысăк интереспе курчĕç. "Мĕнле кăна тума пĕлнĕ-ши("_ терĕç тĕлĕнсе. Тăманлă Выçлири Зинаида Киргизован, Çĕнĕ Мăратри Ольга Макарован тĕррисем куçа шартараççĕ. Сĕтел çиттипе минтер пичĕсене, ытти япаласене ытла та çыпăçуллă та тирпейлĕ тĕрленĕ. "Тĕрлĕ пусма-тавар татăкĕсенчен мĕн тери хитре кавир çĕлеме пулать иккен. Авă, шыв юхса выртать, çыран хĕрринче _ хăмăшсем. Киммисем те кунтах",_ терĕç куракансем Тури Тимĕрчкассинчи Рина Ежергина ĕçĕ умĕнче чылайччен чарăнса тăрса. Чăнах та, ал ĕç ăсти тăван тавралăх илемне тĕлĕнмелле витĕмлĕ кăтартнă. Анат Ти-мĕрчкассинчи Людмила Шорникова та тĕрлĕ татăксенчен сĕтел çитти çĕленĕ. Нимĕн те калаймăн, хитре япала пулса тухнă. Аслă Чурачăкри Елена Леонтьева кофтисемпе свитерĕсем çине пĕр вĕçĕм пăхас килет. Çип-çинçе çăм çипписенчен ытармалла мар тумтир çыхнă. "Магазинтинчен те хитререх",_ терĕç Ăстаçăсен хулинче пулнисем. Ольга Федоровна Ершова _ Шурут Нурăсран. Вăл çулленех районти ĕçпе юрă тата спорт уявне хутшăнать. Çăпата тăвать, сурпан тĕртет, хушпу çĕлет. Кунта вăл тунă пĕчĕк çăпата-сувенирсем те туянма пулать. Пĕр мăшăр çăпатине, ытарайманнипе, ЧР строительство министрĕ В.Филатов туянчĕ. Пукане те çĕленĕ, ăна чăвашла тумлантарнă. Кĕпине те, сурпанне те хăех хатĕрленĕ. "Акатуя ỹлĕмрен те хутшăнасчĕ-ха, Ăстаçăсен хулинче район çыннисемпе килнĕ хăнасене çĕнĕрен çĕнĕ экспонатсемпе савăнтарасчĕ. Сывлăх кăна пултăр",_ тет хавхаланса ĕç ветеранĕ. Хирти Явăшри Римма Орлован чăваш хĕр-арăмĕ-пуканийĕ те пурне те хăй патне илĕртет. Кивĕ Сĕнтĕрти Елизавета Алексееван, Юнтапари Вера Федорован, Лидия Анисимован, Агафия Федотован, Людмила Казакован, Çĕнĕ Мăратри Валентина Прокопьеван, Хырай Ĕнелĕнчи Мария Абрамован кавирĕсемпе тĕррисем пурне те тĕлĕнтерчĕç. Урмаелĕнчи Гельфире Хайрутдинован, Йỹç Шăхалĕнчи Елена Андрееван ĕçĕсем те пысăк хака тивĕçлĕ. Асанкассинчи Анна Романован кавирĕсемпе тĕррисем районта кăна мар, республикăри ал ĕç ăстисен выставкисенче те кашнинех хăйсем патне илĕртнĕ. Пултарать ветеран, тĕррисемпе çынсене савăнтарать. Çĕнĕ Кипеçри Владимир Можаев, Кĕçĕн Çĕрпỹелĕнчи Сергей Тарасов, Хирти Явăшри Радик Гордеев, Нĕркеçри Петр Ксенофонтов, Йăлмахвари Альберт Кузьмин, Хырай Ĕнелĕнчи Геннадий Егоров, Комсомольскинчи Николай Тимофеев йывăçран касса тĕрлĕ япаласем, чĕрчунсем ăсталанă, вĕсем питĕ хитре пулса тухнă. Акă, хĕрача чăххисене тулă сапса парать, лейкăпа чечексем шăварать... Вĕсене Тукай Мишерĕнчи Рушания Зинатуллина тĕрленĕ, кашни ĕçне рама ăшне вырнаçтарнă. Киров поселокĕнчи Ирина Григорьева тăмран кăмпасем, пуканесем тунă, Тăманлă Выçлири Людмила Павлова çемçе теттесем çĕленĕ, Хирти Явăшри Лилия Мифтахова чустаран пуканесем тунă. Урмаел вăтам шкулĕнче вĕрентекен Вагиз Камальтдинов ỹкерчĕкĕсем çуллен район çыннисене тарăн та пуян содержанийĕпе, хăйсен илемĕпе тыткăна илеççĕ. Хальхинче те вĕсен умĕнче çын йышлă пулчĕ. Çапла, пирĕн район çыннисем ĕçлеме те, юрлама-ташлама та, ал ĕç тума та пултараççĕ.

Первоисточник: "Каçал Ен"