Июнĕн 18_20-мĕшĕсенче Шупашкарта Республика кунне халалласа Пĕтĕм чăвашсен çуллахи V спорт олимпиади иртнĕ. Унта хутшăннисем спортăн тĕрлĕ енĕпе ăмăртса мала тухассишĕн "Олимпийский", "Спартак" стадионĕсенче, Сывлăх çуртĕнче вăй виçнĕ. Чăваш Республикин Президенчĕн Н.Федоровăн парнине çĕнсе илессишĕн "Спортпа туслă çемье" çăмăл атлетика ăмăртăвĕсем те республикăн тĕп стадионĕнчех иртнĕ. Çемье командисем хушшинче пирĕн районти Асанкассинчи Салаевсен çемйи те пулчĕ. Тамара Васильевна, Вячеслав Максимович тата вĕсен 13 çулхи хĕрĕ Аня район чысне çỹлте тытас тесе старта пысăк хавхаланупа тухнă. Вĕсем дартс, сĕтел çинчи теннис ăмăртăвĕсенче аван кăтартусем тунă. Эстафетăра №çăмăл атлетака№ ашшĕ 200, амăшĕ 140, хĕрĕ 60 метрлă дистанцинче вăй виçнĕ. Шывра ишессипе ирттернĕ ăмăртусенче Аня 25 метрлă дистанцире пултарулăхпа палăрнă, амăшĕ Тамара та хăйĕн дистанцине №25 метр№ лайăх ишсе тухнă, ашшĕ Вячеслав 50 метрлă дистанцире пысăк ăсталăх кутартнă. Судья пĕтĕмлетĕвĕ Салаевсем спорт олимпиадинче виççĕмĕш вырăн йышăннине çирĕплетнĕ. Старта пурĕ 16 çемье команди тухнă. Çĕнтерỹçĕ çемьесене республикăн спорт министрĕ В.М.Краснов ăшшăн саламланă, спортра ăнăçу суннă.

Первоисточник: "Каçал Ен"