400 çул хушшинче çак çĕр çинче мĕн чухлĕ тар тăкман-ши çĕр çынни, мĕн чухлĕ куççулĕ юхнине шутласа та кăлараймăн. Вăхăчĕ-вăхăчĕпе савăнмалли те пулнах. Тăватă ĕмĕр хушшинче çак çĕрсем çинче темиçе ăру улшăннă. Çапах та Тимĕрчкасси ялĕсем халиччен кунашкал чаплă та ĕлккен уяв курман та пуль. Çак ялсен тăватă ĕмĕрхи юбилейне паллă тума июлĕн 10-мĕшĕнче ял-йышсем те хăнасем те йышлăн пухăнчĕç. Пирваях кỹршĕ ялсенчен, район центрĕнчен килнĕ фольклор ушкăнĕсем шкул картишĕнчи симĕс курăклă стадионра вăййа тухрĕç. Вăйă юррисене шăрантарса таврана янратрĕç. Тĕрлĕ çĕртен килнĕ сутуçăсем апат-çимĕç, ытти таварсем сĕнчĕç. Вунă сехетре уявăн савăнăçлă пайĕ пуçланчĕ. Хаклă хăнасем сцена çине хăпарчĕç. Ял администрацийĕн пуçлăхĕ Н.М.Иванов ялти хисеплĕ ватăсенчен уява уçма ирĕк ыйтрĕ. Ĕлĕкхи йăлапа, "шурсухалсем" ял юбилейне лайăх паллă тума пиллерĕç. Ун хыççăн "Луч" ялхуçалăх кооперативĕн председателĕ А.П.Капитонов пурне те чаплă уяв ячĕпе саламларĕ, праçникре аван канма, савăнма, юрлама-ташлама сĕнчĕ. Сумлă хăнасем те сăмах илчĕç. Район администрацийĕн пуçлăхĕ Г.Ф.Волков Анат тата Тури Тимĕрчкассинче пурăнакансене 400 çулхи юбилей ячĕпе ăшшăн саламларĕ. "Сирĕн пысăк уяв. Сирĕн çеç те мар вăл, районăн, республикăн, пĕтĕм тĕнчен те. Мĕншĕн тесен кунта тĕрлĕ районсенчен, Америкăран килнĕ хăнасем те пур. Юбилее хатĕрленсе ялсене самаях тирпей-илем кĕртнине палăртрĕ Геннадий Федорович, çак ĕçе малалла та тăсасса шаннине пĕлтерчĕ. Район администрацийĕн парни _ культура, вĕрентỹ учрежденийĕсене юсама укçа-тенкĕ. ЧР ялхуçалăх министрĕн çумĕ В.В.Григорьев "Луч" колхозран тивĕçлĕ канăва тухнă ĕç ветеранĕсене, халь кунта ĕçлекенсене министерствăн Хисеп грамотисене, Тав çырăвĕсене пачĕ. Сумлă хăнасем хушшшинче "Чăвашрегионгаз" ООО генеральнăй директорĕ К.С.Мифтахутдинов, "Кĕтне" ентешлĕх председателĕ В.Н.Гордеев, ЧР Патшалăх Канашĕн депутачĕсем Г.В.Васильев, Ю.Ф.Моисеев №Патăрьел№, чăваш халăх поэчĕ В.В.Туркай тата ыттисем пулчĕç, тимĕрчкассисене саламласа парнесем пачĕç. Тимĕрчкасси каччи, "Хыпар" издательство çурчĕн генеральнăй директорĕ _ тĕп редакторĕ А.П.Леонтьев аваллăха тишкерекенсемпе пĕрле ялсен историне тĕпчес енĕпе нумай ĕçлет. Уява пухăннисене Алексей Петрович Тимĕрчкасси ялĕсен П.Пупин скульптор тунă гербĕпе паллаштарчĕ. Ун çинче _ яла тимĕрçĕсем пуçласа янине сăнлакан сунталпа мăлатук. Варринче _ хĕç. Çак ялсенче çуралса ỹснисем хушшинче шалти ĕçсен органĕсенче ĕçлекенсем, çар çыннисем, спортсменсем чылайăн. Акă, В.Г.Плешков Çĕнĕ Шупашкар хулинче шалти ĕçсен пайне ертсе пырать. Ф.А.Кондратьев адвоката, А.Г.Егоров тренера пĕлменнисем те сахал пуль. Хăйсен çак тата ытти паллă ентешĕсемпе чăннипех мухтанма пултараççĕ тимĕрчкассисем. Чăваш Республикин Правительствин секретариачĕн ертỹçи И.М.Воропаев В.Степанов çемйине çурт çавăрма тавăрса памалла мар ссуда илмелли свидетельствăна пачĕ. Çакă хресчен çемйишĕн питĕ пысăк пулăшу ĕнтĕ. Уяв савăнăçĕ Тимĕрчкассинче сĕм çĕрлечченех пычĕ. Çĕнĕ Мăратран, Аслă Чурачăкран, Комсомольскинчен, Тăманлă Выçлирен пынă фольклор ушкăнĕсем, Шупашкар артисчĕсем концертпа савăнтарчĕç. Спортсменсем ирĕклĕ майпа, чăваш йăлипе кĕрешекенсене кăтартрĕç. Праçник фейерверкпа вĕçленчĕ. 400 çулхи юбилее тимĕрчкассисем питĕ тĕплĕ хатĕрленнĕ. Çакăншăн питĕ нумай вăй хуни куçкĕрет. Районти Акатуй шайĕпе иртрĕ вăл, программи питĕ анлă та пуян пулчĕ. Çакăнта ял тата район администрацийĕсен, культура пайĕн, "Луч" ялхуçалăх кооператив правленийĕн тỹпи питенх те пысăк.

Первоисточник: "Каçал Ен"