Çĕрулми _ укçа-тенкĕ тума май паракан çимĕç, çавăнпа та ăна районти хуçалăхсем самай пысăк лаптăксем çине лартаççĕ. Чи нумай гектар йышăнакан лаптăк вара _ "Слава картофелю" агрофирмăра. Кунта "иккĕмĕш çăкăра" тĕнчере малта пыракан технологипе çитĕнтереççĕ, çавăнпа ăна туянас текенсем те пур. Акă, иртнĕ эрнере агрофирмăна Мускав хулинчи апат-çимĕç департаменчĕн делегацийĕ килчĕ. Пахчаçимĕç хуçалăхĕн пуçлăхĕ Л.Кульшина, "Рамзай" АУО "Алтуфьев" компанийĕн ушкăнĕсен тĕп директорĕ Ю.Волков тата "Курьяновское" АУО тĕп директорĕн пĕрремĕш çумĕ А.Холоднов "Слава картофелю" агрофирмăн, "Слава" ялхуçалăх производство кооперативĕн çĕрулми лартнă уйĕсене çитсе курчĕç. Мускав хăнисем тата республикăри çĕрулми туса илес енĕпе специализациленекен хуçалăхсен ертỹçисем "Слава картофелю" ОООра тăвакан çĕрулми вăрлăхне упрамалли хранилищĕпе, яхуçалăх техникипе те паллашрĕç. Ĕçтешсем, партнерсем хушшинче питĕ уçă та шанăçлă калаçу пулчĕ. Кăларса илес çĕрулмин пысăк пайне Мускава ăсатас пирки килĕшỹ турĕç. "Урожай", "Расвет", "Луч", "Заря" хуçалăхсем те "Иккĕмĕш çăкăра" Голланди технологийĕпе çитĕнтереççĕ, çавăнпа вĕсемпе ĕçлеме те хирĕç мар мускавсем. Пахчаçимĕç хуçалăхĕн пуçлăхĕнчен Л.Кульшинаран мĕншĕн-ха шăпах Чăваш Республикипе çакăн пек çыхăнусем йĕркеленине ыйтрăм. _ Чăваш Енпе, "Слава картофелю" агрофирмăпа пĕрремĕш çул çеç ĕçлеместпĕр. Мĕн килĕшет-ха( Пахалăхлă çĕрулми çеç сутаççĕ, ăна наука ыйтнă пек çитĕнтереççĕ. Кунти çынсем те уçă кăмăллă, вĕсемпе ĕçлеме çăмăл. Çавăнпа та çак хутшăнусем çирĕп пулĕç тесе шутлатăп,_ терĕ Людмила Леонидовна Кĕркунне, çĕрулмине кăларма вăхăт çитсен тĕл пулма шантарса сывпуллашрĕç мускавсем.

Первоисточник: "Каçал Ен"