Часах çитĕнтернĕ тырпула пухса илмелли вăхăт çитет. Вырма умĕн чăваш хресченĕ ĕлĕкрех çурла тăлĕсене çивĕчлетнĕ, халь комбайнсене юсаса хатĕрлеççĕ. Хуçалăх ыврмана епле хатĕрленнине пĕлес тесе иртнĕ эрнекун район администрацийĕ тĕрĕслев ирттерчĕ. Тăватă ушкăн ялхуçалăх кооперативĕсене çитсе курчĕ. Район администрацийĕн пуçлăхĕ Г.Волков ертсе пыракан ушкăн малтанах "Победа" кооператива çитрĕ. Кунта вырмана 4-5 комбайн хутшăнмалла, хальлĕхе виççĕшне юсаса пĕтернĕ. Çунтармалли-сĕрмелли материалсем малтанхи тапхăра çитмелле. Комбайнерсем, водительсем çителĕклĕ. Кăçалхи çу çумăрлă килчĕ, анчах "Победăра" нỹрлĕ тырра типĕтсе кĕртме сушилка çук. Складсене çуса тасатнă, дезинфекциленĕ. Çапах та ытти йывăрлăхсем пур. "Урожай", "Рассвет", "Заря", "Труд" хуçалăхсенче вырмана хатĕрленсе çитнĕ. Техникăна юсаса лартнă, йĕтемсене тасатнă, кскладсем те тырă йышăнма хатĕр. Тырă сотлакан агрегатсене те йĕркене кĕртеççĕ. Пĕр сăмахпа каласан, ку хуçалăхсенче çитĕнтернĕ тырпула вăхăтра, тирпейлĕ пуçтарса кĕртес шанчăк пур. Юлашки çулсенче хăшпĕр кооперативсенче çураки тата вырма вăхăтĕнче техникăпа ĕçлеме кадрсем çитменни те пулкалать. Акă, "Пайгас" хуçалăха та пырса тивнĕ çакăнпек тума. Кунта хальлĕхе икĕ комбайн хуçасăр. Çитменлĕхсем татах та пур. Шăп комисси пынă кунхине тăманлăвыçлисем пухăва пуçтарăннăччĕ. Вырмара ĕçленĕшĕн епле тỹлемеллине, нормăсене пăса тухнă. Тен, çакăн хыççăн хир карапĕсен "капитанĕсем" тупăнĕç( "Луч" кооперативра кăçал вырмана 5 комбайн тухать. Икĕ комбайнĕ çĕнĕ тимĕрчкассисен "Енисей-950" маркăллине вара кăçал лизинг мелĕпе туяннă. Ăна Виталий Павлова çирĕплетсе панă. Паха енĕсем чылай çак комбайнăн: топливо сахалрах çунтарать, бункерне нумайрах тырă кĕрет, кадина питĕ хăтлă, кондиционерпа тата ытти те. Халлĕхе кун пек техника районта пĕрре кăна. Г.Волков ертсе пынă комисси çак пынă хуçалăхсенчен "Пайгасра" тата "Победăра" çеç лару-тăру кăткăсрах. Вырмана тухиччен вăхăт пур-ха. Вăл вăхăтчен асăннă кооперативсенче çитменлĕхсене пĕтерессе шанас килет.

 "Комсомольскинчи сельхозтехника" акционер обществин генеральнăй директорĕн çумĕ И.М.Мартынов ертсе пыракан ушкăн "Асаново", "Восток", "Красный маяк", "Алга" ялхуçалăх кооперативĕсенче, Минатуллинăн хуçалăхĕнче, "Дубовка" ОООра пулса курчĕ. Мĕн калама пулать-ха( Пур çĕрте те пикенсех вырмана хатĕрленеççĕ. Хир карапĕсене юсаççĕ, йĕтемсем çинче ĕçлеççĕ, кĕлетсене хатĕрлеççĕ... Кашниех хăйсем вырма ирттерессине ăнланаççĕ. Çунтармалли-сĕрмелли материалсем хатĕрленĕ, çитменнине çывăх вăхăтра турттарса килĕç. Унччен вăл е ку запас пай тупайманнипе хăшкăлнă пулсан, халĕ вăл ыйту çивĕч тăмасть. Укçа-тенкĕ пулсан кирек ăçтан та тупма пулать. Вырмана вара пĕр пуссăр ирттереймĕн. "Асаново" тата "Восток" колхозра вырмара тырă çапса тĕшĕлекен 6-шар комбайн, "Алга" ялхуçалăх кооперативĕнче 5 комбайн ĕçлĕ. "Красный маяк" хуçалăхăн тырă çапса тĕшĕлекен 2 комбайн анчах тата тепри вырнă çĕрте тăрăшĕ. Кашни комбайна 150-шар гектар лекет. Ку сахалах мар. Минатуллин хуçалăхĕн пĕрчĕллĕ тата пăрçа йышши тырăсем 90 гектар йышăнаççĕ, ăна çулса çапса тĕшĕленĕ çĕрте пĕр комбайн ĕçлĕ. Механизаторсем енĕпе хĕсĕкрех пулин те вырма пуçланиччен çак енĕпе хуçалăх ертỹçисем кадрсем тупасса шанаççĕ. Йĕтемсемпе кĕлетсем те çỹлерех асăннă хуçалăхсенче çĕнĕ тырă йышăнма хатĕр тесен те юрать. Районти пушар чаçĕн инспекторĕ В.Б.Тихонов вырмара пушартан сыхланас ыйтусемпе калаçрĕ. Комбайн çинче шыв тултарнă фляга, хăйăр ещĕкĕ, кĕреçе, шăпăр пулмалла. Йĕтемсем çинче пушарта кĕрешмелли хатĕрсен щичĕ, шывлă савăт лармалла. Минатуллинăн хуçалăхĕ тата "Дубовка" ООО _ çамрăк хуçалăхсем. Унта та кăçал мĕн çитĕнтернине йĕркелĕ пуçтарса кĕртессе шанма пулать "Дубовка" обществăра пикенсех юсав ĕçĕсем пыратчĕç. Кĕçех районти уй-хирсенче тырпул пиçсе çитĕ, ăна вăхăтра тата пахалăхлă пухса кĕртесчĕ. Унччен вара мĕн кирлине хатĕрлесе çитересчĕ. 

 Район администрацийĕн пуçлăхĕн пĕрремĕш çумĕ, ялхуçалăх управленийĕн начальникĕ Г.М.Киргизов ертсе пыракан ушкăн малтанах "Комсомольская" сăнав станцийĕнче пулчĕ, кунта вырмана еплерех хатĕрленнипе интересленчĕ. Вырмана 4 комбайн хутшăнать. Вĕсем халех уй-хире тухма хатĕр. Техникăпа опытлă механизаторсем ĕçлеççĕ. Акă, "Дон" комбайнерĕ _ А.С.Гладков. Вăл _ хуçалăхри чи пултаруллă та хастар комбайнерсенчен пĕри. Анатолий Семенович ку вырмана вăл ывăлĕпе, тинтерех çеç Чăваш патшалăх ялхуçалăх академийĕн механизаци факультетне пĕтерни çинчен диплом илнĕ Вячеславпа, пĕрле тухать. "Çанталăкĕ çеç лайăх тăтăрччĕ, эпир мĕн пултарнă таран тăрăшăпăр, тырпула вăхăтра пухса кĕртес тесе çине тăрăпăр",_ тет вăл. Хуçалăх çĕнĕ техникăпа та пуянлансах пырать. Çак кунсенче кунта çĕн "Енисей" комбайн илсе килмелле. "Изамбаево" ялхуçалăх кооперативĕнче икĕ "Нива" комбайнран пĕри юсавлă. Тепĕрне çак кунсенчех хута яраççĕ. "Турхан" хуçалăхра хĕрсех юсав ĕçĕсем пыраççĕ. Кунта кĕлетсемпе складсене çуса тасатнă, дезинфекциленĕ. Вĕсем çĕнĕ тырра йышăнма хатĕр. Кунта рулонлă утă-улăм тюкĕсене тиеме погрузчик тунă. Унта Юрий Коновалов, Владимир Максимов электрогазосварщиксем, Анатолий Мордяков токарь тăрăшнă. Вĕсене хуçалăхри инженер сĕнỹсемпе пулăшнă. "Культура", "Красный Октябрь" хуçалăхсенче техникăна вырмана хатĕрлес ĕçсем япăхрах пулса пыраççĕ. Халлĕхе кунта комбайнсем вырмана хатĕр мар-ха. Складсене те дезинфекци туман. Механизаторсем те çитмеççĕ. Çунтармалли-сĕрмелли материалсемпе тивĕçтерес ыйту та çивĕч тăрать. "Дружба" хуçалăхра ĕççине 7 комбайн хутшăнать. Вĕсем паянах ĕçе хатĕр. "Кадрсем çителĕклĕ. Вырмана ăнăçлă ирттерме мĕнпур услови пур. Механизаторсемпе ĕçченсем хăйсенчен мĕн килнине пурне те тăвĕç. Çанталăкĕ çеç хальхи пек çумăрлă ан тăтăрччĕ",_ тет хуçалăх ертỹçи Н.Носов.

Районти ялхуçалăх управленийĕн тĕп инженерĕ В.В.Галкин ертсе пыракан ушкăн чăн малтан "Кызал сабанча" фермер хуçалăхне çитрĕ. Кунта выльăх апачĕ хатĕрлесси аван пырать. Механизаторсем техникăна вырмана хатĕрлесе çитернĕ. Вырмана 3 комбайн хутшăнмалла, вĕсем хатĕррисен ретĕнче. ЖРБ, ЖВН жаткăсем те вырмана хатĕр. Кĕлеткесене шуратса дезинфекци тунă. "Север" кооперативра пĕр улшăну та çук. Çак таранччен утă та, сенаж та хатĕрлемен. Техника хире тухĕ е тухмĕ, кун пирки калаçу тума йывăр. Çунтармалли-сĕрмелли материалсем илме кĕсъе шăтăк. "Правда" кооперативри лару-тăру вара чи йывăррисенчен пĕри темелле. Кунта вырмана виçĕ комбайн хутшăнмалла. Иккĕшĕн моторĕ шакканă. Комбайнерсем çук. Вырмалли вара 350 гектар. Çак вăхăт тĕлне те комбайнсем патне, механизатор алли пырса тĕкĕнмен. Хуçалăх пĕр центнер та утă хатĕрлемен. Сенаж хывасси те тивĕçлĕ шайра мар. Курăк çулаканни те КИР-2,5 анчах. Хуçалăхăн агрономĕ те çук. "Дубрава" кооперативра та вырмана тăрăшсах хатĕрленеççĕ теме çук. Пĕр комбайн ĕçе хутшăнмалла. В.Н.Смирнов комбайнерăн хире пулăшаканĕсĕрех тухма тивет. Анчах та тухайĕ-ши вăл( Кооператив çунтармалли-сĕрмелли материалсем хатĕрлесе ĕлкĕреймен. "Искра" колхоз ĕçченĕсем яланхиллех хăйсен пултарулăхĕпе палăрса тăраççĕ. Кунта 130 тонна утă хатĕрлеме, 1200 тонна сенаж хывма ĕлкĕрнĕ. Пилĕк комбайнран виççĕшĕ курăк çулма хутшăннă. Пурте хатĕррисен ретĕнче. 360 гектар çинчи тырра вĕсем питĕ хăвăрт пухса илĕç. Сортировкăсене те пăхса, юсаса тырă йышăнма хатĕрлесе çитернĕ. Кĕлетсене шуратса дезинфекци тунă. Кашни комбайн çинче 2-шер шăпăр пур, огнетушительсем çакнă. "Красное Сормово" кооперативра кăçал тырра 300 гектар çинчен пухса илмелле. Икĕ комбайнра пĕри кăна хире тухма хатĕр. Апла пулсан В.Н.Митрофанов управляющи №халĕ кооператив председателĕ№ вырма ĕçĕсене тивĕçлĕ шайрах ирттерме шантарать. "Слава" кооператив инженерĕ Р.М.Вахитов хуçалăхри механизаторсемпе кăмăллă. Мĕншĕн тесен кашни комбайн №вĕсем тăваттă№ хирсе тухсан пĕр кăлтăксăр ĕçлемелле, вырмана тăрăшса хатĕрленнĕ. Жаткăсем те тырă çулма хатĕр. Çунтармалли-сĕрмелли хатĕрсем çителĕклĕ. Солртировкăсене, кĕлетсене тырă йышăнма хатĕрлесе çитернĕ, юсанă, шуратнă, дезинфекци тунă. Кăнтăрла иртсен хуçалăхсен руководителĕсем, кооперативсенче пулнă комиссисен членĕсем район администрацийĕн ларусен залне пуçтарăнчĕç. Кунта районти ялхуçалăх управленийĕн тĕп агрономĕ И.Х.Минатуллин, тĕп инженерĕ В.В.Галкин, "Комсомольскинчи сельхозтехника" акционерлă обществăн тĕп инженерĕ И.М.Мартынов, районти ялхуçалăх управленийĕн начальникĕ Г.М.Киргизов хуçалăхсенчи вырма умĕнхи лару-тăрупа паллаштарчĕç. Çавăн пекех вырма ĕçне хăвăртрах ирттерессипе тăракан ыйтусемпе ỹсентăран чирĕсемпе кĕрешес тĕлĕшпе ĕçлекен районти станцин специалисчĕ А.Н.Смирнов, техника хăрушсăрлăĕн тĕп инженерĕ Н.В.Прокопьев, ГИБДД уйрăмĕн начальникĕ А.А.Салицев, район прокурорĕ В.А.Гришин, "Урожай" колхоз председателĕ А.Н.Ершов тухса калаçрĕç. Канашлу ĕçне район администрацийĕн пуçлăхĕ Г.Ф.Волков пĕтĕмлетрĕ. .