Нумай пулмасть район хаçатĕнче "Комсомольски ялĕ. Ĕнер тата паян" статья пичетленнĕччĕ. Çак статьяра район центрĕн аталанăвĕн хăшпĕр енĕсене çутатса панăччĕ. Ку статьяра çырни çумне хушса каласшăн. Строительство ĕçĕ _ йывăр та хисеплĕ. Çын çурт лартать пулсан, вăл хăйĕн пулас ăрăвĕн малашлăхĕ çинчен шутлать. Вăл _ мал ĕмĕтлĕ. Паян лайăх пурăнас-ха, ыран мĕн пулĕ, текен шухăшпа пурăнмасть вăл. Çурт лартасси уйрăм çыншăн та, предприяти, организаци пуçлăхĕшĕн те кăткăс та йывăр ĕç. Çурт лартакан çын умне мĕнле кăна кĕтмен ыйту сиксе тухмасть пулĕ _ е укçа-тенкĕ çитеймест, е кирлĕ материал тупма çук. Строительство нормисемпе правилисем нумай кăткăслăх кăларса тăратаççĕ: пушартан сыхланас ĕçсем, санитари нормисем, çыхăну, газ, канализаци коммуникацийĕсене шута илесси тата тем те пĕр. Район центрĕн аталанăвĕпе çыхăннă строительство ĕçĕсем çинче чарăнса тăрам-ха. Иртнĕ çул вĕçленес умĕн шалти ĕçсен пайĕн хăтлă çĕнĕ çурчĕ хута кайрĕ. Унччен, утмăл çул ытла милици уйрăмĕ ĕлĕк вулăс кантурĕ пулнă кивĕ йывăç çуртра ĕçленĕ. Ăна юсанă та, аслăлатнă та, çапах кунта кирлĕ условисем пулайман, "хваттер" те шырама тивнĕ. Çак çурта унччен шалти ĕçсен пайĕн начальникĕ пулнă П.В.Лапшин çине тăнипе тума тытăннăччĕ. Анчах тĕрлĕ сăлтавсене пула вăл вăраха тăсăлчĕ. Аса илер-ха тата почта çыхăнăвĕ пĕчĕк çуртсенче нушаланса ĕçленине. Почта кантурĕн начальникĕ пулнă Г.С.Квасов сахал чупмарĕ çĕнĕ çурт лартасшăн. Кунта çĕнĕ техника вырнаçтарма май килчĕ. Çыхăну аталанса пынă май, çĕнĕрен лартнă çурт та тивĕçтерейми пулчĕ. Ĕлĕк аптека пулнă çурт вырăнне почта, телефон, телеграф çыхăнăвĕ тата служба кантурне вырнаçтарма çурт ларт-тарчĕç. Аптекăн çĕнĕ çуртне лартас ĕçе аптека заведующийĕ пулнă Ю.П.Кутаков нумай вăй хучĕ, ăна халĕ тăрăшакансем те, малтан ĕçленисем те ырăпа çеç асăнаççĕ. Район библиотеки пĕр кивĕ çуртран тепĕр кивĕ çурта куçнăччĕ. Кунта ĕçлеме те, кĕнекесем упрама та условисем пулман. Библиотека валли хăтлă çĕнĕ çурт лартас ыйтупа район администрацийĕ те, унăн культура пайĕн заведующийĕ В.С.Васильев та пысăк тимлĕх уйăрчĕç. Халĕ пирĕн библиотека _ кăтартуллă библиотека, кунта халĕ информаци центрĕ те. Нумай енлĕ ĕç тăвать вăл. ЗАГС уйрăмĕ те, МСЭ бюровĕ те кунта "хваттер" тупрĕç. Кĕтне леш енче МСОн пысăк производство базине тăвас ĕçре А.Г.Гильфановпа Б.М.Каринкин, кабель завочĕ тăвас ĕçре Н.А.Симендеевпа Г.И.Гончаров пысăк пултарулăх кăтартнине палăртма кăмăллă. Райпо председателĕ пулнă В.И.Баранов сăра завочĕ №халĕ "Кооператор" производство комбиначĕ№ тăвас ĕçе пысăк тимлĕх уйăрчĕ. Халĕ комбинат директорĕнче ĕçлекен Е.А.Карпеева производство базине аталантарма, продукци пахалăхне ỹстерме нумай вăй хурать. Комбинат продукцине çынсем кăмăлласа туянаççĕ. Райпо председателĕ пулнă В.Д.Тумаланов суту-илỹ предприятийĕсене çĕнĕрен тăвассине, реконструкцилессине çулленех пысăк тимлĕх уйăрса ырă ĕç турĕ. Халĕ райпо совечĕн председателĕ Е.И.Карпеев суту-илỹ базине аталантарнипе пĕрлех унăн хăтлăхĕ-илемлĕхĕ, дизайнĕ çине ытларах тимлĕх уйăрнине палăртсан та ытлашши пулмĕ. Пирĕн магазинсем, ресторан-столовăйсем хулари суту-илỹ предприяти-йĕсенчен пĕрре те кая мар. Илемлĕх вăл ыррине çуратать. Йăла çурчĕ лартма П.К.Скворцов директор пысăк вăй хунине те палăртас килет. Район администрацийĕ район центрне аталантарас, унăн илемлĕхне ỹстерес енĕпе нумай вăй хунине палăртма кăмăллă. Район центрĕнче тата ялсенче производство, культура çурчĕсем лартас ĕçре Б.М.Каринкинăн тỹпи питех те пысăк. Вăл строительство ĕçне чунне, пĕлĕвне, пултарулăхне парать. Район центрĕ те, районти ялсем те хăтлă çуртсемпе илемленсе пырасса шанатпăр. Çуртсемпе пĕрле халăхăн культури те ỹссе пымалла. Çакăн пек пултăрччĕ пурнăç тĕллевĕ.

Первоисточник: "Каçал Ен"