Сентябрĕн 5-мĕшĕнче СССР летчик-космонавчĕ, икĕ хут Совет Союзĕн Геройĕ, Чăваш Республикин хисеплĕ гражданинĕ А.Г.Николаев 75 çул тултарнă пулĕччĕ. Çак паллă юбилей ячĕ-пе ЧР Вĕрентỹ тата Физкультурăпа спорт министерствисем çăмăл атлетсен чупăвне йĕркеленĕ. Вăл сентябрĕн 2-мĕшĕнче ирхине старт илнĕ. Пирĕн район иккĕмĕш ушкăна кĕрет. Унăн маршручĕ _ Шăмăршă _ Па-тăрьел _ Комсомольски _ Канаш _ Çĕрпỹ _ Тувси ялĕ _ Шуршăл. Сентябрĕн 2-мĕшĕнче кăнтăрла иртсен пĕр сехетре Патăрьел район чиккинче чупăва хутшăнакансене район администрацийĕн пуçлăхĕн çумĕ _ вĕрентỹ управленийĕн начальникĕ Н.А.Максимов, физкультурăпа спорт пайĕн специалисчĕ Е.А.Тихонов, Кĕçĕн Çĕрпỹел вăтам шкулĕн спортсменĕсем кĕтсе илчĕç. Кунта Патăрьел спортсменĕсем эстафетăна каçалсене пачĕç. Пĕчĕк тĕлпулура спортсменсене Патăрьел, Комсомольски районĕсен администраци пуçлăхĕсен çумĕсем С.Н.Тарасов, Н.А.Максимов, Е.А.Тихонов специалист чăваш халăхĕн мухтавлă ывăлĕ ячĕпе йĕркеленĕ чупăва хутшăнакансене ăна ăнăçлă вĕçлеме сунчĕç, çĕнĕ вĕренỹ çулĕ пуçланнă ятпа саламларĕç. Асăнмалăх пĕрле сăн ỹкерттернĕ хыççăн спортсменсем çула тухрĕç. "Дружба" хуçалăх чиккинче кĕçĕнçĕрпỹелсене Хирти Явăш вăтам шкулĕнче вĕренекенсем ылмаштарчĕç. Çул Елчĕке пăрăнса каякан çĕрте Комсомольски 2-мĕш вăтам шкулĕн ачисем кĕтсе илчĕç. Вĕсем район центрнех чупса çитрĕç. Сентябрĕн 3-мĕшĕнче чупу малалла тăсăлчĕ. Комсомоль-ски 1-мĕш вăтам шкулĕнчи тĕлпулу хыççăн çак шкулта вĕренекенсем çăмăл атлетсене Канаш районĕн чиккине çити ăсатрĕç. Маршрут çинче спортсменсене ГИБДД сотрудникĕсем, медицина ĕçченĕсем те пулăшса пычĕç. А.Г.Николаева, çамрăксен тата сывă пурнăç йĕркине халалланă чупу сентябрĕн 4-мĕшĕнче Шуршăлта вĕçленет. Кунта 5 маршрутпа кайнă спортсменсем пурте тĕл пулаççĕ.

Первоисточник: "Каçал Ен"