Çĕнĕ Мăратри Ваттисен çуртĕнче 11 хĕрарăм пурăнать. Вĕсем хушшинче ача-пăча çуратса вĕсене пурнăç çулĕ çине кăларнисем те, ĕмĕрĕпех вăхăтне пĕчченлĕхре ирттерекеннисем те пур. Пире пурне те пĕр тĕллев - килте пăхакан çукки-çыхăнтарать. Çавăнпа кунта килнĕ те эпир. Ваттисен çуртĕнче пурăнакансем вăтамран 77 çулта. Елена Соловьева вара 63-ре. Вăл хăй пурнăçĕнче хура-шурне сахал мар курнă. Мăшăрĕпе 3 ача çуратса ỹстернĕ, пурнăç çулĕ çине кăларнă. Халь вĕсем Шупашкарта пурăнаççĕ. Ашшĕпе амăшĕ вара, ватăлса пынă май, ачисем патне хулана кайма шутламан, Ваттисен çуртне кайнă. Шел пулин те, хĕрарăмăн мăшăрĕ çĕре кĕчĕ. Мария Агафонова, Александра Кудякова тата Аслă Отечественнăй вăрçă участникĕ Анастасия Васильева сакăрвуннăран иртнĕ. Часах Мария Никитина та 80 çул тултарать. Пирĕн хĕрарăмсем пурте маттур та пултаруллă, тирпейлĕ. Вăй çитнĕ таран кунти ĕçсене тума пулăшаççĕ. Çуллахи вăхăтра вĕсем килĕсене кайса пахчара ĕçлеççĕ. Кăçал панулми, слива ăнса пулчĕç. Çавна май Мария Никитина, Александра Васильева пире улма-çырлапа сăйларĕç, апат пĕçерме купăста, çĕрулми илсе килчĕç. Александра Кудяковăпа Зинаида Андреева - кăмпаçĕсем. Вĕсем тăрăшнипе эпир те çак çимĕçе çисе куратпăр. Александра Петрова кунта 7-8 çул пурăнать. Анна Морозовăшăн, Федосия Мазовăшăн, Елена Жусьевашăн тата ыттисемшĕн те çак çурт тăван кил пек хаклă. Ваттисен çурчĕн заведующийĕ Валентина Карповна Уткина пирĕншĕн яланах ăшă сăмах тупать, кунти хăтлăхшăн çине тăрать. Нина Васильевна Макарова ватăсене тутлă та сĕтеклĕ апат пĕçерсе çитерес тесе çине тăчĕ. Халь ку ĕçе Елена Васильевна Чубукова туса пырать. Эпир унăн ĕçĕпе кăмăллă. Октябрĕн пĕрремĕшĕнче- Ваттисен кунĕ. Çавна май эпĕ пурнăç çулĕпе нумай çул утакансене уяв ячĕпе саламлатăп, сывлăхлă та вăрăм ĕмĕрлĕ пулма сунатăп.

Первоисточник: "Каçал Ен"