ШУПАШКАРТА НАЦИ КРОСĔНЧЕ ĂМĂРТРĔÇ...

Вырсарникун, юпа уйăхĕн 3-мĕшĕнче, Чăваш Республикин тĕп хулинче Шупашкарта "Пĕтĕм Раççейри чупу кунĕ - нацисен кросĕ" ятпа массăллă ăмăрту иртрĕ. "Спорт- террора хирĕç" девизпа йĕркеленĕ ăна. Çав кунах пирĕн районта та çуллахи спорт сезонĕ хупăннă ятпа çăмăл атлетсен ăмăртăвĕ пулчĕ. Район хаçачĕн "Каçал енĕн" парнисене çĕнсе илессишĕн Комсомольски вăрманĕ хĕрринче нумай спортсмен старта тухрĕ çак кун. Ăмăртусем ултă ушкăнра иртрĕç: вăтам шкулсен, тĕп шкулсен, ял администрацийĕсен, предприятисемпе учрежденисен, ветерансен, çемье командисен хушшинче. Пирваях старта тĕп шкулсен командисем тухрĕç (9-мĕш класс таран). Кунта йăлмахвасем пĕрремĕш, Александровка спортсменĕсем иккĕмĕш, хиртиявăшсем виççĕмĕш вырăнсене йышăнчĕç. Вăтам шкулсен командисем хушшинче хиртиявăшсене çитекенни пулмарĕ. Иккĕмĕшпе виççĕмĕш вырăнсене Асанкасси тата Хырхĕрри шкулĕсем пайларĕç. Кăçал- çамрăксен тата сывă пурнăç йĕркин çулталăкĕ. Аслисем çитĕнекен ăрăва аван тĕслĕх кăтартрĕç çак кун. Ял администрацийĕсенче, предприятисемпе организацисенче ĕçлекенсем, çемье командисем те ăмăртăва хутшăнчĕç. Предприятисен командисем хушшинче финиша пĕрремĕш александровкăсем çитрĕç. "Дружба" ялхуçалăх кооперативĕнчен килнĕ спортсменсем - иккĕмĕш вырăнта, Комсомольски 2-мĕш вăтам шкулĕ - виççĕмĕш. Ял администрацийĕсенче ĕçлекенсем хушшинчи тупăшу та хĕрỹ, кăсăклă пулчĕ. Специалистсемпе пĕрлех администраци пуçлăхĕсем чупрĕç. Чи маттуррисем вара хиртиявăшсем пулчĕç, Александровка тата Кайнлăк ял администрацийĕсен командисене иккĕмĕшпе виççĕмĕш вырăнсене хăварчĕç. Çак кун чи кăсăкли çемье командисен ăмăртăвĕ пулчĕ ахăртнех. Эстафетăллă чупăва пилĕк çемье хутшăнчĕ. Александровкăсем вара чи хастаррисем- Алексеевсем, Дьяконовсем, Антоновсем ачисене те пĕчĕкренех физкультурăпа спорта юратма вĕрентеççĕ. Хирти Явăш ял администрацийĕнчен килнĕ Давыдовсемпе Комиссаровсене те районта пурăнакансем аван пĕлеççĕ. Давыдовсем хальхинче дистанцие мăнукĕпе, Дианăпа тухрĕç. Сăмах май каласан, Диана ăмăртăвăн чи çамрăк участникĕ пулчĕ. Хĕрача виççĕре çеç-ха. Çемье командисем хушшинче Алексеевсем çĕнтерỹçĕ ята çĕнсе илчĕç. Иккĕмĕшпе виççĕмĕш вырăнсенче - Дьяконовсемпе Комиссаровсем. Ветерансенчен чи хăвăрт чупакансем- "Дружба" ялхуçалăх кооперативĕн команди. Нĕркеç вăтам шкулĕнчи учительсем те вăй-хал енчен çирĕп-ха, вĕсем "Единая Россия" командине кая хăварма пултарчĕç. Ăмăрту кăтартăвĕсене пĕтĕмлетнĕ хыççăн район администрацийĕн пуçлăхĕ Г.Ф.Волков çĕнтерỹçĕсене Хисеп грамотисем парса чысларĕ. Спорт уявне йышлăн хутшăннăшăн тав туса пурне те сывлăх, ăнăçу сунчĕ. "Каçал ен" парнисене вара- район хаçатне 2005 çулхи пĕрремĕш çур çулта Хирти Явăш, Хирти Мăнтăр вăтам шкулĕсем, Александровка, Эльпуç ял администрацийĕсем, Александровкăри Алексеевсен çемйи илсе тăрĕç. "Каçал ен" хаçат редакцийĕ çуллахи спорт сезонне хупнă çĕре хутшăннă кашни спортсмена тата çак ăмăртусене йĕркелесе ирттерме пулăшнă çынсене пурне те ятран тав тăвать. Чупу нацисен кросĕпе пĕр кунта килни те ăнсăртран мар тесех калассăм килет, çапла майпа район çыннисем пирĕн халăх та терроризма хирĕç пулнине çирĕплетсе пачĕç. Спорт уявне чи йышлăн хутшăнакансем вара эльпуçсем пулчĕç. Çак ял администраци территорийĕнче пурăнакан 39 çын спорт уявне килнĕ. Кашни ушкăнрах сумлă вырăн йышăнма пултарчĕç вĕсем. Александровкăсем, нĕркеçсем хастар пулнине те палăртма кăмăллă. Анчах ялхуçалăх кооперативĕсен командисем сахалли шухăшлаттарать. Çулсеренех "Дружба", "Восток" спортсменĕсем çеç старта тухаççĕ. Ытти хуçалăхсенче çăмăл атлетикăна юратакансем çук-шим( 2005 çулхи çуллахи спорт сезонне уçиччен вăхăт пур-ха. Çак тапхăрта вăй пухма, старта тухма хатĕрленсе çитме сунатпăр сире, "Каçал ене" юратакансем.

Первоисточник: "Каçал Ен"

Опубликовано

06 октября 2004
00:00

Распечатать

ШУПАШКАРТА НАЦИ КРОС&#276;НЧЕ &#258;М&#258;РТР&#276;&Ccedil;...

ШУПАШКАРТА НАЦИ КРОСĔНЧЕ ĂМĂРТРĔÇ...