Октябрĕн 1-мĕшĕнче пĕтĕм тĕнче Ваттисен кунне уявларĕ, тĕнчепе пĕрлех- пирĕн район та. Пилĕк ветераншăн уйрăмах савăнăçлă пулчĕ вăл. Шурут ялĕнчи Е.Т.Ильин, Çĕнĕ Сĕнтĕрти П.Я.Силанов, Тукай Мишерĕнчи Ш.Н.Ахметзяновпа З.З.Зинатуллин, Кĕçĕн Çĕрпỹелĕнче пурăнакан Ф.И. Кашин вăрçă участникĕсем "Ока" машинăллă пулчĕç. Çак пысăк парнене тивĕçлех вĕсем. Акă, Федор Иванович Аслă Отечественнăй вăрçă çулне пуçламăшĕнчен мĕн вĕçне çитичченех утса тухнă. Связист-строитель Украина 2, 3-мĕш фрончĕсенче, Курск пĕккинче çапăçнă, Венгрие, Австрие ирĕке кăларнă çĕре хутшăннă. Ветеранăн кăкăрне II степеньлĕ Аслă Отечественнăй вăрçă орденĕ, "Германие ирĕке кăларнăшăн", "Çапăçури паллă ĕçсемшĕн" тата ытти медальсем илемлетеççĕ. Ш.Ахметзяновпа З.Зинатуллин та çапăçури паттăрлăхшăн I, II степеньлĕ Аслă Отечественнăй вăрçă орденĕсене, чылай медаль илме тивĕç пулнă. Мирлĕ пурнăçра вара вĕсем пурте ĕçре çитĕнỹсем тунă. Ветерансене район администрацийĕн пуçлăхĕ Г.Ф.Волков тата социаллă хỹтлĕх пайĕн заведующийĕ И.А.Никитина Ваттисен кунĕ ячĕпе ăшшăн саламларĕç, автомашинăсен уççисемпе докуменчĕсене парнелерĕç. Автомашинăсем хуçисене урамра кĕтсе илчĕç. Çав кунах район пуçлăхĕ Г.Волков "Искра" колхозри ветерансен уявне хутшăнчĕ. Кунта праçнике 130 яхăн пенсионер пуçтарăннă. Паянхи кун та вĕсенчен чылайăшĕ хуçалăх ĕçне хутшăнать. Çĕрулми пуçтарса кĕртнĕ çĕрте те пысăк пулăшу панă ветерансем. Халĕ те хастарлăхне, вăй-халне çухатманшăн тав турĕç вĕсене район пуçлăхĕпе колхоз председателĕ В.П.Краснов.

Первоисточник: "Каçал Ен"