Октябрĕн 8-9-мĕшĕсенче районта йывăçсем лартмалли экологи субботникĕ иртрĕ. Çак ĕçе "Труд" ялхуçалăх кооперативĕн ĕçченĕсем, Аслă Чурачăк вăтам шкулĕнче вĕренекенсем хастар хутшăнчĕç. Аслă Чурачăкран Вăрманхĕрри Чурачăк ялне каякан çул хĕррине 1 пин тĕп йывăç хунавĕсем лартнă. Тепĕр пин тĕп йывăç лартма палăртнă. Чĕчкен ял администрацийĕнче тирпей-илем ыйтăвĕпе çине тăрса ĕçлеççĕ. Ку енĕпе "Труд" ялхуçалăх кооперативĕ пысăк пулăшу парать. Темиçе çул каялла Шур çырми çывăхĕнче лартнă йывăçсенчен пĕчĕк вăрман пулса тăчĕ. Урмаелпе Чĕчкен хушшинчи çул хĕрринчи йывăçсем вăй илсе пĕве кайрĕç. Анчах та чунсăр çынсем çамрăк хурăн хунавĕсене касса амантни пăшăрхантарать. 

Первоисточник: "Каçал Ен"