Вăрман хуçалăхĕн коллективĕ 2005 çул Садсемпе парксен çулталăкĕ пулнине пĕлтернине хапăл туса кĕтсе илчĕ. Мĕншĕн тесен çак йышăну района тирпей-илем кĕртессинче, ешĕл тумпа витессинче пуçаруллăрах, тăрăшуллăрах, тĕллевлĕрех ĕçлеме хистетех. Тата лартнă йывăçсене, тĕмсене сыхласа хăварассинче те тивĕçлĕ условисем тăватех. Пирĕн йышăнмаллах: çулсерен кашни ялта мĕн чухлĕ йывăç лартатпăр пулĕ, анчах вĕсен пурнăçĕ çийĕнчех татăлать, вăй иличченех выльăх-качка кăшласа ярать. Вунă-çирĕм çул хушшинче лартнă пĕтĕм йывăçа шута илес пулсан, район çак тапхăрта ешĕл вăрман ăшĕнче пулмалла. Тунă ĕç çине çавăн пек сỹрĕккĕн пăхни (йывăçсене хỹтĕлеменни) пире, вăрман ĕçченĕсене, çав тери тарăхтарчĕ. Президент указĕ вара районти экологири лару-тăрăва пачах улăштармалла. Вăл кашнин яваплăхне ỹстерет. Районта çак указа пурнăçлас енĕпе ĕçсем пуçланчĕç те ĕнтĕ. Акă, пирĕн вăрман хуçалăхĕн питомникĕнчен районти 7 ял администрацине пурĕ 33 пин тĕп юман, хыр, чăрăш, çăка, хурăн, шурă чăрăш (лиственница) хунавĕсене (саженцы) уйăрса патăмăр. Хамăр хуçалăхра та тумалли ĕçсен тĕллевлĕ планне çирĕплетрĕмĕр. Кăçал кăна 50 гектар çинчи вăрмана çĕнетрĕмĕр, 5 картуна тирпей-илем кĕртессипе ĕçлерĕмĕр, йывăç лартрăмăр. Çĕнĕ Мăратри тата Шельтемри садсенче (вĕсем 15 гектар йышăнаççĕ) йĕрке турăмăр, йывăçсене пăхрăмăр, тирпейлерĕмĕр. Çитес çул (çуркунне) А.Г. Николаев космонавта халалласа 4 гектар çинче йывăç лартма палăртрăмăр. Ун валли ятарлă участок уйăрнă. Тепĕр участокне, вăл 1,8 гектар йышăнать, Аслă Çĕнтерĕве 60 çул çитнине халалланă. Кунти ĕçсене те çитес çуркунне тума палăртнă. Пирĕн питомникра ултă тĕрлĕ йывăç хунавĕсем (çỹлерех асăнтăм) çитĕнеççĕ. Район çыннисем, хуçалăхсем, предприятисемпе организацисем халĕ те, çуркунне те вĕсене туянма пултараççĕ. Мĕн чухлĕ кирлĕ, çавăн чухлĕ уйăрса пама пултаратпăр. Ман шутпа, кашни ялта парк пулмалла, кашни килте сад ешермелле. Чăваш Республикин Президенчĕн Н.Федоровăн указне çавăн пек ăнланмалла та.

Первоисточник: "Каçал Ен"