81 çулхи С.И.Зубарев спортпа çав тери туслă пулни вĕри чĕреллĕ, мал ĕмĕтлĕ ветерана Раççей шайĕнче иртекен тĕрлĕ спорт ăмăртăвĕсенче çĕнтерỹçĕсен шутĕнче пулма май парать. Полиатлона (спортăн нумай енĕпе тупăшасси) юратса пăрахнă Сергей Иванович. Хĕллехи тата çуллахи полиатлонра вăл лайăх кăтартусем тăвать, кашни чемпионатран е ылтăн, е кĕмĕл, е бронза медальпе таврăнать. Кăçал кăна спорт ветеранĕ çавăн пек ăмăртусенче тăхăр хутчен пулчĕ, Мускава тата Мускав облаçне (Одинцово, Красногорск)( 6 хутчен, Ярославле, Рязане кайса килчĕ, çĕнтерỹпе таврăнчĕ. Сентябрĕн 24-26-мĕшĕсенче, Сергей Иванович Хура тинĕс хĕрринчи Анапăра çуллахи полиатлон ăмăртăвĕсем вĕç-леннĕ ятпа ирттерекен ăмăртусене хутшăнчĕ. Кунта Раççей, Белорус, Украина, Эстони, Казахстан спортсменĕсем старта тухнă. Сергей Иванович 1000 метра 4 минут та 48 çеккунтра чупса, 50 метра 45 çеккунтра ишсе тухса, винтовкăран персе 37 очко пуçтарса (50 очко пуçтармалла) иккĕмĕш вырăн çĕнсе илнĕ. Ăна кĕмĕл медальпе, дипломпа чысланă. СНГна кĕрекен çĕршывсен полиатлонисчĕсем хушшинче Сергей Иванович чи ватти пулнă, унăн старта 70 çултан аслăраххисемпе (ăмăртусен условийĕ çавăн пек) тухма тивнĕ. Акă, пĕрремĕш вырăн йышăннă Украина спортсменĕ пирĕн ветеранран 10 çул кĕçĕн, 71 çулта. Халĕ С.И.Зубарев Раççейре ирттерекен хĕллехи полиатлон ăмăртăвĕсене хутшăнма хатĕрленет. Саламлатпăр ĕçпе вăрçă, спорт ветеранне, ăнăçу сунатпăр.

Первоисточник: "Каçал Ен"