Хирти Мăнтăр вăтам шкулĕнче ачасене тарăн пĕлỹ парас тесе преподавательсем ырми-канми вăй хураççĕ. Кашнийĕ хăйĕн ĕçне чун-чĕрипе парăннă, чапшăн мар, вĕрентỹпе воспитани ĕçне тивĕçлĕ шайра туса пырассишĕн тăрăшать, шкул чысне çỹлте тытса пыма пур майсемпе те усă курса ĕçлет. Ачасене тарăн пĕлỹ пани кăна мар, вĕсене професси туянма та условисем туса панă. Акă, 9-11-мĕш классенче вĕренекен хĕрачасем çĕвĕç пулассишĕн занятисене йĕркеллĕ çỹреççĕ, арçын ачасем механизатор специальноçне туянасшăн, трактор вĕренеççĕ. Иртнĕ вĕренỹ çулĕнче 10 хĕр-ача аттестатпа пĕрле "Портной легкой одежды" ятарлă свидетельство аллине илнĕ. Уроксенче вĕсем халатсем, шăлаварсем, кĕпесем тата ытти япаласем те çĕлеççĕ, майĕпен çĕвĕç ĕçне хăнăхса пыраççĕ. Шкул пĕтерсен хăшĕ-пĕри çав ĕçпех малалла вĕренме каять. Сăмахран, Наташа Краснова шкулта илнĕ çак специальноçпа Шупашкарта çĕвĕ фабрикинче илемлĕ кĕпе-тумтир çĕлет. Кăçалхи вĕренỹ çулĕнче те çĕвĕ ĕçĕн урокĕсене 17 хĕрача çỹрет. Акă, пирĕн фотокорреспондент 11-мĕш класра вĕренекен Альбина Тимофеевăпа Марина Медведевăна вĕсен преподавателĕпе Альбина Шатовăпа пĕрле урокра ỹкерсе илнĕ. Альбина Ивановна - çĕвĕ ĕçĕн мастерĕ, çĕвĕ машини умĕнче вăл 30 çул ытла ларнă, халĕ хăйĕн пысăк, паха опытне ачасене парать. Уроксенче вĕсемпе ĕçлеме ỹркенсе тăмасть, ăста çĕвĕç тăвассишĕн тăрăшать, çавăнпа ăна хĕр-ачасем хисеплеççĕ, унăн сĕнĕ-вĕсене туллин пурнăçласа пыраççĕ. Ку тăрăхри ачасем мĕн пĕчĕкрен пилĕк авса, тар юхтарса ĕçлеме хăнăхнă. Вĕренỹре пултаруллă, ĕçре хастар вĕсем. Ку вара шкул чысне тата та çỹлерех çĕклеме пулăшать. Вĕренекенсем çакна питĕ лайăх ăнланаççĕ.

Первоисточник: "Каçал Ен"