Районти ялхуçалăх кооперативĕсенче, колхозсенче, фермер хуçалăхĕсенче тăрăшакансемшĕн кăçалхи çул çăмăл пулмарĕ. Тăтăшах çумăрсем çукаласа тăни агротехника ĕçĕсем тума чăрмантарчĕ, хăшпĕр лаптăксем çăвĕпех шыв айĕнче тăчĕç. Паллах, çак условисенче пысăк тухăç пирки калаçаймăн. Çапах та çĕрĕçченĕсем пуç усмарĕç. Паян, районта Ялхуçалăхĕнче тата тирпейлекен промышленноçра ĕçлекенсен уявне ирттернĕ кун, вĕсене тав сăмахĕ каласшăн. Тырпул тухăçĕ пĕлтĕрхинчен пĕчĕкрех. Районĕпе пурĕ 15592 тонна пĕрчĕллĕ тата пăрçа йышши тырăсем пуçтарса илнĕ. Вăтам тухăç кашни гектар пуçне 16 центнер ытла. Темĕнле хĕн пулсан та "Рассвет" ялхуçалăх кооперативĕ вара гектартан 24,2 центнер тырă туса илме пултарчĕ. "Слава", "Искра", "Восток", "Кызыл сабанча", Минатуллин фермер хуçалăхĕсенче, "Госсорткомисси" ФПУра та тухăç 20 центнер ытла пулнă. Çĕрулми вара кăçалхи пек тухăçпа 1993 çултанпах савăнтарманччĕ. Районĕпе "иккĕмĕш çăкăра" пурĕ 25282 тонна е кашни гектар пуçне 187 центнер пухса кĕртнĕ. Уйрăмах "Рассвет" ялхуçалăх кооперативĕн кăтартăвĕ пысăк. Кунти ĕçченсем 70 гектар çинче çĕрулми çитĕнтернĕ. Вăтам тухăç кашни гектар пуçне 313 центнерпа танлашать. Ку кăтарту республика шайĕнче те чи пысăкки. "Слава картофелю" агрофирма" ООО лаптăкĕ 287 гектарпа танлашнă. Унтан 7749 тонна çĕрулми туса илнĕ. Республикăри Улатăр, Куславкка, Хĕрлĕ Чутай, Сĕнтĕрвăрри, Пăрачкав, Вăрмар, Шăмăршă районĕсенче туса илнĕ "иккĕмĕш çăкăрăн" пĕтĕм калăпăшĕнчен те вĕсем ытларах. "Слава", "Луч", "Заря" хуçалăхсенче те тухăç 200 центнертан иртнĕ. "Урожай" колхоз 130 гектар çинчен 188-шар центнер çĕрулми илнине те ырламалла. Çак çитĕнĕве асăннă хуçалăхсем çĕнĕ техника туянса Европа шайĕнчи технологипе усă курнипе тунă. Сахăр кăшманĕпе юлашки вăхăтра чылай хуçалăх ăнăçлă ĕçлеме пуçларĕ. Кăçал та яланхи пекех ку енĕпе "Слава" ялхуçалăх кооперативĕ палăрчĕ. Унта пурĕ 140 гектар çак пылак çимĕçе çитĕнтернĕ. 4 пин ытла тонна тымарçимĕç сахăр заводне ăсатнă. "Труд", "Алга", Минатуллин хуçалăхĕсенче те 50 ытла гектар çинче сахăр кăшманĕ тухăçлă çитĕнтернĕ. Юлашки çулсенче çеç туса хунă çĕнĕ хуçалăхсем (Минатуллинăн, Атласкинăн фермер хуçалăхĕсем) çĕр ĕçĕ çине пысăк тимлĕх уйăрнине палăртса хăварас килет. Хăмлана "симĕс ылтăн" теттĕмĕр те, пĕр вăхăт унпа ĕçлени тупăшлах пулманччĕ. Кăçал "Алга" тата "Асаново" ялхуçалăх кооперативĕсем 10-шар гектар лаптăк çинчен чылай типĕ хăмла ăсатрĕç, тупăш аванах пулчĕ. Малашне вĕсем çак культурăн лаптăкне татах та ỹстересшĕн. "Рассвет", "Восток", "Труд", "Кызыл сабанча" хуçалăхсем, "Госсорткомисси" ФПУ кĕркуннех çитес çулхи тухăçшăн тăрăшаççĕ. Вĕсем вăрлăха кондицие лартас тесе çине тăраççĕ. Çỹлерех асăннă цифрăсем, паллах, хуçалăхсенчи пултаруллă механизаторсен тăрăшулăхĕсĕр пулман. Çĕр ĕçĕ шăпах вĕсем çине тиенет. Паянхи кăткăс пурнăçра çăвĕпе тар тăкса çăкăр, çĕрулми çитĕнтерекенсем чыс-хисепе тивĕçлĕ. Эпĕ уйрăмах тăрăшулăхпа палăрнă А.И.Филиппов ("Заря"), В.П.Ярлыгин ("Слава"), Н.Н.Никифоров ("Урожай"), Г.П.Васильев ("Рассвет") механизаторсене асăнатăп. В.П.Козлов ("Урожай"), Д.А.Соловьев ("Рассвет"), А.Н. Миллин ("Урожай"), Н.Г.Кокшин ("Искра") водительсем те чыс-хисепе тивĕçлĕ. С.Н.Крысов ("Госсорткомисси" ФПУ), П.Н.Аполонов ("Дружба"), В.И. Степанов ("Слава"), Н.М.Гаврилов ("Урожай") комбайнерсем вырмара палăрчĕç. Хуçалăхсем темĕнле йывăр пулин те машинăпа трактор паркне çĕнетсе пыраççĕ. Ку енĕпе "Рассвет", "Урожай", "Луч", "Восток", "Труд", "Слава" тата хăшпĕр хуçалăхсене палăртмалла. Выльăх-чĕрлĕх отраслĕнче çăвĕн-хĕлĕн ĕç чарăнмасть. Вĕсен ĕçĕ ирех пуçланать те каçченех тăсăлать. Районти хуçалăхсем кăçалхи 9 уйăхра 11992 центнер аш-какай туса илнĕ. 100 гектар çĕр пуçне шутласан "Рассвет", "Пайгас", "Восток" хуçалăхсен кăтартăвĕсем пысăк- 87-70 центнер. Выльăх-чĕрлĕх йышĕ чакать. Çавăнпа та районти сĕт-çу фермисем пĕлтĕрхинчен пăртак каярах сĕт туса илнĕ- 63920 центнер. "Рассвет" ялхуçалăх кооперативĕнчи ĕнесем январь- сентябрь уйăхĕсенче кашни 4606 килограмм, "Асаново" тата "Восток" хуçалăхсенче 4281-3593 килограмм сĕт антарнă. Кашни 100 гектар çĕр пуçне "Асаново", "Рассвет", "Восток" хуçалăхсем ытларах сĕт суса илнĕ. Халăхран сĕт пуçтарас енĕпе "Труд" (5399 центнер), "Асаново" (5377), "Луч" (3868) хуçалăхсем палăрса тăраççĕ. "Асаново", "Слава", "Урожай" хуçалăхсенче выльăхсен ỹтхушаслăхĕ пысăк. Фермăсенче нумай çул ĕçлесе паха опыт пухнă, выльăхсене чун-чĕререн пăхакан ĕçченсем сахал мар. Эпĕ "Рассвет" тата "Асаново" хуçалăхсенчи О.В.Наумовăпа Л.И.Чижикова дояркăсене, "Урожай" колхозри Е.В.Казиковăпа А.П.Пыркина пăру пăхакансене, "Искра" колхозри В.Н.Рыжовăпа В.В.Сенькович скотниксене, "Слава" ялхуçалăх кооперативĕнчи С.М.Семеновăпа Н.М.Михайлова сысна самăртакансене, çак хуçалăхри Н.Ю.Мавринапа Ф.А.Павлова сысна пăхакансене хастар ĕçшĕн ăшшăн саламласшăн. "Заря" ялхуçалăх кооперативĕнчи Л.В.Шуряшкина, "Правда" хуçалăхри С.Т.Краснов хурт-хăмăрçăсем, "Дружба" хуçалăхри Г.Н.Орлов конюх, "Асаново" ялхуçалăх кооперативĕнчи Е.П.Демьянова техник-осеменатор ĕçре çитĕнỹсемпе палăрчĕç. Çĕрĕçченĕн те, выльăх-чĕрлĕх пăхаканăн та ĕçĕ йывăр. Вĕсене пурне те Ялхуçалăхĕнче тата тирпейлекен промышленноçра ĕçлекенсен уявĕ ячĕпе ăшшăн саламлатăп. Çирĕп сывлăх, телей, пурнăçра ăнăçу тата пысăк çитĕнỹ сунатăп.

Первоисточник: "Каçал Ен"