Иртнĕ эрнере Шупашкарта шкул ачисем хушшинче ирттерекен Спартакиадăн 2-мĕш ăмăртăвĕ пулса иртрĕ. Хальхинче спортсменсем сĕтел çинче теннисла вылярĕç. Турнира республикăри 27 команда хутшăнчĕ. Пирĕн район чысне Комсомольски 1-мĕш вăтам шкулĕнче вĕренекен Олеся Степанова, 2-мĕш вăтам шкулти Павел Краснов, Антон Андреев тата Таня Плаксина хỹтĕлерĕç. Малтанах пĕтĕм командăсене 5 ушкăна пайларĕç. Пирĕн ушкăнра Çĕмĕрле тата Етĕрне хулисен, Шупашкар районĕн командисем вăй виçрĕç. Комсомольскисем çĕмĕрлесене 4:0 шутпа, Шупашкар районĕн командине 3:1 шутпа çĕнтерме пултарчĕç. Ушкăнри пĕрремĕш вырăншăн етĕрнесемпе тупăшмалла пулчĕ. Питĕ хĕрỹ иртрĕ тĕлпулу. Арçын ачасем 2:0 шутпа выляса илчĕç, хĕрсем 2:0 шутпа выляса ячĕç. Мăшăрлă вăйăра етĕрнесем вăйлăрах пулса пирĕнтен 3:2 шутпа выляса илчĕç, ушкăнра пĕрремĕш вырăн йышăнчĕç. Вĕсем ăмăртăвăн 1-5-мĕш вырăнĕсемшĕн кĕрешме ирĕк çĕнсе илчĕç. Малалли ăмăртусенче пирĕн команда Тăвай район командине 3:2 шутпа, красноармейскисене 3:1 шутпа çĕнтерме пултарчĕ. Ăмăртăвăн улттăмĕш вырăнĕшĕн Вăрнар районĕн командине выляса ярса пирĕн команда пĕтĕм командăсем хушшинче саккăрмĕш вырăн йышăнчĕ, яллă районсем хушшинче - 3-мĕш вырăн. Пĕтĕмлетỹ тăрăх район команди 22 очко çĕнсе илчĕ (пĕрремĕш вырăншăн 30 очко параççĕ, иккĕмĕш вырăншăн - 29 тата ытти те). Спартакиадăн çитес тупăшăвĕ- шахматла вылясси. Ăмăртăвăн ушкăнри вăййисем Вăрнарта ноябрĕн 3-мĕшĕнче иртрĕç. Финалти ăмăртусем ноябрĕн 7-мĕшĕнче Çĕнĕ Шупашкарта пулса ирт-мелле. Районăн пĕрлештернĕ команди çак вăйăсене тĕплĕн хатĕрленет.

Первоисточник: "Каçал Ен"