Районта пурăнакансенчен "Кооператор" производство комбиначĕн продукцине тутанса курман çын çук та пуль. Çăварта ирĕлекен "петушокăн", кукуруза çăнăхĕнчен тунă пылак çимĕçĕн, тутлă кăлпассин тути кашнин асĕнчех ĕнтĕ. Комбинат хута кайнăранпа туса кăларнă сăрана, лимонада тата минераллă шыва йăлтах пĕрле пуçтарас пулсан вара тинĕс те тулать-тĕр. Ноябрĕн 5-мĕшĕнче çак завод ĕçе кайнăранпа 30 çул çитрĕ. Завод историйĕпе кунта вăй хуракансен кун-çулĕ те таччăн çыхăннă. Çавна май "Кооператорăн" уявне те тĕрлĕ çулсенчи çынсем, унта ĕçлекенсем, ветерансем, хăнасем заказчиксем - ытти районсенчи райпо председателĕсем пуçтарăннă. Уява "Кооператор" производство комбиначĕн директорĕ Е.А.Карпеева уçрĕ. "Чăвашпотребсоюз" совечĕн председателĕ В.М.Павлов ăшă салампа, хаклă парнесемпе килсе çитнĕ. Вăл "Центросоюз" совечĕн председателĕн В.Ф.Ермаковăн саламлă телеграммине вуласа пачĕ, производствăра нумай çул вăй хуракансене, ĕçре малта пыракансене "Чăвашпотребсоюзăн" Хисеп грамотисемпе наградăларĕ. Район администрацийĕн пуçлăхĕ Г.Ф.Волков хăйĕн сăмахĕнче "Кооператор" район экономикинче пысăк вырăн йышăннине палăртрĕ. Суту-илỹре ĕçлекенсен республикăри профсоюз комитечĕн ертỹçи Т.В.Нюренберг "Эпĕ тата манăн çемье комсомольскисем кăларнă минераллă шыва çеç ĕçетпĕр" тени вара юрату сăмахĕ каланă пекех пулчĕ. Сăра завочĕ ĕçлеме пуçласанах Комсомолькине Мичурин хулинчи технологи техникумне пĕтернĕ вырăс хĕрĕсем ĕçлеме килнĕ. Вĕсемшĕн "Кооператор" иккĕмĕш кил, Каçал ялĕ тăван çĕршыв пулса тăнă. Уявра Т.Белобаева, О.Сорокина, Т.Гончарова, Р.Кисапова, М.Боровкова "Гимн пивоваров" юрра çĕкленỹллĕн шăрантарчĕç. Производство комбиначĕн директорĕнче нумай çул ĕçленĕ, халь Шупашкарти "Универбазăна" ертсе пыракан Н.И.Абанинăн асаилĕвĕсене те кăсăкланса итлерĕç пухăннисем. Районти культура çурчĕн ĕçченĕсем, ачасен искуссство шкулĕн воспитанникĕсем "Кооператор" ПК уявĕ ячĕпе чаплă концерт кăтартрĕç. Юбилярсене парнеленĕ букетсенчен вара илемлĕ чечек композицийĕ пулса тăчĕ.

Первоисточник: "Каçал Ен"