Ноябрĕн 17-мĕшĕнче пирĕн районта ЧР Чрезвычайлă лару-тăру енĕпе ĕçлекен патшалăх комитечĕ хăйĕн кунне ирттерчĕ. Халăхпа тĕл пулма ЧР Чрезвычайлă лару-тăру енĕпе ĕçлекен патшалăх комитечĕн председателĕ В.Н.Петьков, унăн çумĕ А.А.Черников, пай начальникĕ Ю.С.Иванов, тĕп специалисчĕ Н.П.Прокопьев, С.Е.Антонов специалист, патшалăх пушар надзорĕн сотрудникĕ Я.А.Егоров, ЧР Президент Администрацийĕн пай начальникĕ В.М.Алентьев килсе çитрĕç. Вĕсем 4 ушкăна пайланса ĕçлерĕç. В.Н.Петьков ушкăнĕ район центрĕнчи халăх йышлă пулакан вырăнсенче чрезвычайлă ситуацирен асăрханас тĕлĕшпе мĕнле лару-тăру пулнипе паллашрĕ. Пушар чаçне, "Кооператор" производство комбинатне çитсе курчĕ. Районти чрезвычайлă лару-тăру енĕпе ĕçлекен специалист Н.А.Хайруллов тата А.А.Черников Комсомольски ял администрацийĕнче, тĕп больницăра тата ытти предприятисенче пулса унти ĕç-пуçпа паллашрĕç. Комсомольски пĕрремĕш тата иккĕмĕш вăтам шкулĕсенче гражданла оборона вĕренĕвĕ иртрĕ. Ю.С.Иванов ушкăнĕ Тукай ял администрацийĕнче пулса курчĕ. Малтанах администраци çуртĕнче гражданла оборонăпа çыхăннă документсене мĕнле йĕркелесе пынине тишкерчĕ, сĕнỹсем, канашсем пачĕ. Пушар хăрушсăрлăхĕн ыйтăвĕсем çинче чарăнса тăчĕ. Тукай пĕтĕмĕшле пĕлỹ паракан тĕп шкулĕнче те вăл çак ыйтусене хускатрĕ. Ачасемпе пушар хăрушлăхĕн, шыв-шуртан асăрханас ыйтусемпе калаçусем ирттерессине вăйлатмаллине палăртрĕ. Каçкỹлĕм, 14-15 сехетсенче, район администрацийĕнче халăха йышăнчĕç. Вĕсене интереслентерекен ыйтусем çине хуравларĕç. Тĕлпулусене район администрацийĕн пуçлăхĕ Г.Ф.Волков, пушар чаçĕн начальникĕ С.А.Алексеев тата ытти специалистсем те хутшăнчĕç. Республикăра та, районта та пушар хăрушлăхĕ пысăк. Юсавсăр кăмакасем, вуншар çул каяллахи электропроводкăсем, ачасем шăрпăкпа выляни - пушарсен тĕп сăлтавĕсем. Çакна палăртрĕç тĕлпулусенче чрезвычайлă лару-тăру комитетĕнче ĕçлекенсем. Асăрхануллă пулма, профилактика ĕçне вăйлатма хушса хăварчĕç. 

Первоисточник: "Каçал Ен"