Ноябрĕн 18-мĕшĕнче Комсомольски райповĕнче "Чăвашпотребсоюз" правленийĕн канашлăвĕ иртрĕ. Чăннипе, республикăри кооператорсем пирĕн районта пухăннин сăлтавĕ урăххи. Çак кун Комсомольски райпо совечĕн председателĕ Е.И.Карпеев 60 çул тултарчĕ. Нумай çул суту-илỹ системинче тăрăшнăшăн тата юбилей ячĕпе Евгений Ивановича район пуçлăхĕ Геннадий Волков ЧР Хисеп грамотипе, "Чăвашпотребсоюз" правленийĕн председателĕ Г.В.Григорьев "Центрсоюз" совечĕн председателĕн Тав хутне парса чысларĕç. Ĕçпе уяв юнашарах пулчĕç. Канашлу хыççăн хăнасем район центрĕнчи "Пулăшу салонне", илемлĕх салонĕ теес килет ăна, уçнă çĕре хутшăнчĕç. Кунти персонал ỹт-пĕве, сăн-пите çамрăк та хитре тытма пулăшĕ. Парикмахерски, шăл, массаж, косметологи кабинечĕсенче район халăхне хапăл туса кĕтсе илеççĕ. Суту-илỹ çуртне те çитсе курнă хыççăн автобуссем Йỹç Шăхальне çул тытрĕç. Кунти куллен кирлĕ таварсен магазинне реконструкци туса çĕнĕ сăн кĕртнĕ, сутуçăсем, туянакансем валли условисем лайăхланнă. Малалла уяв "Весна" рес-оранта тăсăлчĕ. Кунта та юсав ĕçĕсем туса ирттернĕ, пысăк зал çуталса çеç тăрать. Евгений Ивановича саламлама, унпа пĕрле савăнма тăванĕсем, республикăри кооператорсем çеç мар, Ульяновск облаçĕнчи ĕçтешĕсем те килсе çитнĕ. Районти суту-илỹ системин аталанăвĕшĕн нумай вăй хуракан Евгений Иванович çак чыса чăннипех те тивĕçлĕ.

Первоисточник: "Каçал Ен"