Раштавăн 1-мĕшĕнче районти ветерансен совечĕ анлă канашлу ирттерчĕ. Ветерансен районти совечĕн председателĕ Ю.Тимофеев канашлăва пухăннисене кăçал районти предприятисемпе организацисенче тата учрежденисенче Ваттисен кунне мĕнле ирттернипе паллаштарчĕ. Пур çĕрте тенĕ пекех ваттисен уявĕ начар мар иртрĕ. Çапах та çак яваплă ĕçре çитменлĕхсем пулман мар. Хăшпĕр ялсенче уява район администрацийĕ çирĕплетнĕ графика пăхăнмасăр, каярах ирттернĕ. Çавна пула уяв пухăвĕсенче район администрацийĕн представителĕсем те пулман. Темиçе хуçалăхра Ваттисен кунне ирттерес ĕçе культура ĕçченĕсем хутшăнман. Ĕç ветеранĕсене вара концерт та кăтартайман. Пенси фончĕн районти управленийĕн пай пуçлăхĕ Е.Челакова çăмăллăхсем парас, компенсацисем тỹлес ĕçре пулакан çĕнĕлĕхсемпе паллаштарчĕ. Вăл çакна палăртрĕ: ĕç тата тыл ветеранĕсем çăмăллăхсемпе малтанхи йĕркепех усă курĕç, вăрçă инваличĕсемпе участникĕсене, чирлесе инвалида тухнисене тата ытти хăшпĕр категорири çынсене 2005 çулхи январьтен пуçласа пенсипе пĕрле укçан компенсаци параççĕ, вĕсем социаллă пакетпа эмелсем илĕç, санаторисене кайма пултарĕç. Управлени çак ĕçе тума хатĕрленсе çитет. Ыйтусем çине хуравланă май çакна палăртрĕç _ укçан компенсаци илекен ĕç ветеранĕсем тивĕç çăмăллăхсемпе усă кураймаççĕ. Коммуналлă пулăшу çăмăллăхĕсем пурин те сыхланса юлаççĕ. Çĕнĕлĕхсем пирки ыйту чылай пулчĕ. ЛТЦ начальникĕ А.Счетчиков вăрçă инваличĕсене, участникĕсене, ытти ветерансене телефон çыхăнăвĕпе тивĕçтерес ĕç мĕнле пулса пынипе, çыхăну ĕçĕнчи çĕнĕ-лĕхсемпе паллаштарчĕ. Район администрацийĕн пуçлăхĕ Г.Волков канашлăва пухăннă ветерансене районта газ кĕртес ĕç мĕнле пыни çинчен каласа пачĕ. Аслă Çĕнтерỹ тунăранпа 60 çул çитнине тивĕçлипе хатĕр-ленсе кĕтсе илес тĕллевпе умра тăракан ĕçсем çинче чарăнса тăчĕ: уява пур çĕрте те тĕплĕн хатĕрленмелле, палăксене, парксене юсамалла, çĕнетмелле, çĕнĕрен тумалла, ялсенче те, район центрĕнче те тирпей-илем кĕртес ĕç çине пысăк тимлĕх уйăрмалла. .

Первоисточник: "Каçал Ен"