"Асаново" ялхуçалăх кооперативĕн выльăх-чĕрлĕх кăтартăвĕсем лайăх. Мĕншĕн? Хуравĕ пĕрре. Кунта çак отрасль çине пысăк тимлĕх уйă-раççĕ. Нумаях пулмасть çак фермăра пулса курнăччĕ те унта хĕле тĕплĕн хатĕрленни куç умĕнчех. Витесем ăшă та типĕ. Çамрăк выльăх валли уйрăм пỹлĕмсем тунă. Ĕнесене хĕлле те уçăлтарма кăлараççĕ. Выльăх апачĕ те çителĕклĕ хатĕрленĕ. Кунта 573 тонна утă пур. Ку районта чи пысăк кăтартусенчен пĕри. 2645 тонна сенаж хатĕрленĕ. Улăм çителĕклĕ. Выльăхсене çитерме 500 тонна тырă фуражĕ уйăрнă. Апат пулсан продукци пулатех ĕнтĕ. Кунта кашни условнăй выльăх пуçне 38 центнер выльăх апачĕ лекет. Хуçалăхра хĕл кунĕсенче те кашни ĕне пуçне 12 килограмм сĕт сăваççĕ. Кăçал та ялхуçалăх кооперативĕ кашни ĕнерен сĕт сăвас енĕпе 5000 чикки урлă каçасса иккĕленмелли çук. Çамрăк выльăх илес тĕлĕшпе те кăтартусем пĕлтĕрхи 11 уйăхринчен лайăхрах. Ĕçлесен кăтартусем пулаççĕ. Ахальтен мар ĕнтĕ Асанкасси ферминче вăй хуракан Л.Чижикова, М.Таркина, В.Яковлева дояркăсем район шайĕнче те палăрса тăраççĕ. Тăрăшсан, ĕçлекенсене хавхалантарса пырсан фермăсем йывăрлăха кĕрсе ỹкмĕç. Çук, çук тесе ларнипе никам та выльăх апачĕ те килсе памасть, витесене те юсамасть. 

Первоисточник: "Каçал Ен"