Совет Союзĕн Геройне Ф.Чернова халалласа çулсерен ирттерекен ирĕклĕ майпа кĕрешекенсен республика шайĕнчи турнир кăçал Асанкассинче 14-мĕш хут иртрĕ. Кавир çинче вăй виçме спортсменсем 10 районтан килсе çитрĕç. Тытăçусене ирĕклĕ майпа кĕрешекен 200 ытла çын, вăл шутран Ульяновск облаçĕнчен те, хутшăнчĕ. Чăн малтан кавир çине 30 килограмм таранхи хĕрачасем тухрĕç. Малти икĕ вырăна Ульяновск облаçĕнчен килнĕ Г.Узинскаяпа Е.Борисова йышăнчĕç. Асанкасси шкулĕнче вĕренекен Н.Митюкова вара виççĕмĕш призер пулса тăчĕ. Унтан тытăçусем 40 килограмм таранхи хĕрачасем хушшинче пуçланчĕç. Кунта чи ăстараххи, чи çивĕчреххи Асанкасси спортсменки Н.Миронова пулчĕ, республика чемпионĕ ята çĕнсе илчĕ. Иккĕмĕшпе виççĕмĕш вырăнсене Комсомольски шкулĕнче вĕренекен Н.Шурбинапа Л.Григорьева тивĕçрĕç. 46 килограмм таранхи виçеллисем хушшинче те Асанкасси хĕрачи В.Козлова пĕрремĕш приза çĕнсе илчĕ. Комсомольскинчен килнĕ О.Ильинапа И.Иванова иккĕмĕшпе виççĕмĕш вырăнсене тивĕçрĕç. Кавир çинче - 52 килограмм таранхи виçери хĕрачасем. Вĕсен хушшинчи тытăçусенче каллех Асанкассси спортсменки О.Денисова чи пултарулли пулчĕ. Иккĕмĕшпе виççĕмĕш вырăнсене Канаш районĕнчен килнĕ А.Семеновăпа О.Моисеева тивĕçрĕç. Арçын ачасем хушшинчи тытăçусем 27 килограмм таранхи виçеллисем хушшинче пуçланчĕç. Кунта вара пултаруллăраххисем Ульяновск облаçĕн спортсменĕсем- Е.Астуховпа А.Борисов пулчĕç. Виççĕмĕш приз хуçи- Асанкасси вăтам шкулĕнче вĕренекен М.Тимофеев. Асанкасси спортсменĕсенчен 30 килограмм таранхи виçеллисем хушшинче çĕнтерỹ-çĕсем пулаймарĕç. Пĕрремĕш вырăна Ульяновск облаçĕнчен килнĕ К.Ратаев, Канаш районĕн спортсменĕ Д.Михайлов иккĕмĕш, Комсомольскинчи П.Журавлев виççĕмĕш вырăнсене çĕнсе илчĕç. Йĕпреç районĕн спортсменĕ Д.Ильин 34 килограмм таранхи виçеллисем хушшинче республика чемпионĕ пулса тăчĕ. Т.Федоров (Канаш), В.Герасимов (Асанкасси) иккĕмĕшпе виççĕмĕш призерсем пулчĕç. 37 килограмм таранхи виçеллисем хушшинче каллех Асанкасси спортсменĕ Г.Данилов виççĕмĕш вырăн йышăнма пултарчĕ. Р.Платонов, А.Евграфов (Канаш) пĕрремĕшпе иккĕмĕш призсене çĕнсе илчĕç. Кавир çинче 41 килограмм таранхи виçери спортсменсем. Асанкасси спортсменĕ Е.Петухов финалти тытăçура К.Емельянова(Канаш) выляса ярса иккĕмĕш вырăна юлчĕ. Виççĕмĕш вырăн _ А.Фадеевăн (Комсомольски). 46 килограмм таранхисем хушшинче те асанкассисем призерсем шутне кĕме пултарчĕç. А.Андреев виççĕмĕш вырăн йышăнчĕ. С.Петровпа А.Афанасьев (иккĕшĕ те Канаш районĕнчен) малти вырăнсен призерĕсем пулчĕç. Д.Денисов (Комсомольски) 50 килограмм таранхи виçеллисемпе вăй виçсе турнирăн иккĕмĕш парнине çĕнсе илчĕ. Ю.Орлов (Канаш), Д.Тимофеев (Елчĕк) пĕрремĕш тата виççĕмĕш вырăнсене тивĕçрĕç. 63 килограмм таранхи виçеллисем хушшинче В.Малышев (Комсомольски) виççĕмĕш вырăна юлчĕ. Кунта елчĕксем Д.Егоровпа А.Пчелов пултаруллăрах пулчĕç - пĕрремĕшпе иккĕмĕш вырăнсене çĕнсе илчĕç. 69 килограмлисен финалĕнче Е.Маштановăн (Комсомольски) Канаш районĕн спортсменĕпе Д.Арефьевпа вăй виçмелле пулчĕ. Тытăçу çивĕч иртрĕ. Е.Маштановăн кунта иккĕмĕш вырăнпа тивĕçме тиврĕ. Д.Арефьев ăстарах кĕрешсе республика чемпионĕ пулса тăчĕ. Турнира йĕркелекенсем вăл тивĕçлĕ шайра ирттĕр тесе тăрăшнă. Çĕнĕ Шупашкарта пурăнакан, ĕçлекен М.В.Козлов çак ăмăртусене ирттерме пысăк пулăшу панă. А.П.Капитонов та çĕнтерỹçĕсем валли сахалах мар парнесем, медальсем хатĕрленĕ.

Первоисточник: "Каçал Ен"